STENBOL - Endama Komeleya Wextê Cinîye Newroz Unverdîye dîyar kerd ke xebata ‘cinîyanê kurdan yê Stenbolî vera bi ziwanê xo, xo biresnê mekanîzmayê têkoşînê vera şîdetî’ dayî destpêkerdiş û vat ke cinî bi dewlete û mekanîzmayê ci ra bawer nêkenê û vat: “Ma adetê têkoşînê wayê Mîrabelî ra yenê. Ma 25ê Teşrîna Peyêne de roja şemeye Mecîdiyekoyî de bê.” 

 

Komeleya Wextê Cinîye, Temmuza 2022yî de ameye awankerdiş û têkoşînê cinîyan rayîr ra bena. Komeleye Stenbol de ya û lazimîyê bi mîlyonan cinîyê kurdî vînena. Komeleye paştî da diziwanî û seba cinîyê ke lazimî bi kurdî vînenê bî merkez. Merkez bado ke ame awankerdiş serra bîn Merkezê Şêwirmendîya Cinîye awan kerd. Komeleye derheqê Merkezê Şêwirmendîye de raporê 5 aşman weşênena. Komeleye çarçeweya 25ê Teşrîna Peyêne de startê xebata ‘cinîyanê kurdan yê Stenbolî vera bi ziwanê xo, xo biresnê mekanîzmayê têkoşînê vera şîdetî’ da destpêkerdiş. Heto bîn de zî komele do roja şeme saet 16.00î de Mecidîyekoyî de çalakî pê bîyara. 

 

Endama komeleye Newroz Unverdîye derheqê xebatan de JINNEWSî rê qisey kerd. 

 

Newroze dîyar kerd ke têkoşînê wayê Mîrabalî ke vera dîktator Rafael Turjîlloyî dayî ewro zi dewam keno û wina vat: “Netîceyê qetilkerdişê wayê Mîrabalî de 25ê Teşrîna Peyêne sey Roja Têkoşînê Vera Şîdetê Serê Cinîyan ameye îlankerdiş. No hedîse 60 serrî verê cû ame ciwîyayîş la hema zî cinî yenê qetilkerdiş û çinî yenê hesibnayîş. Têkoşînê ma zî seba ke no raşte ra bêro wedaritiş o.” 

 

Xebatê raşteyan 

 

Newroze dîyar kerd ke xebatê raşteyan zî bi taybetî waştî ke 25ê Teşrîna Peyêne de bidê destpêkerdiş û vat: “Ma semedo ke şîdet raşte ra wedarnê komele awan kerd. Xebatê ma zî nê hetî de yê. Xebata ma ya ‘cinîyanê kurdan yê Stenbolî vera bi ziwanê xo, xo biresnê mekanîzmayê têkoşînê vera şîdetî’ ya. Komeleya ma serra 2020î de ame akerdiş. Ma serra 2021î de Merkezê Şêwirmendîye akerd. Ma xebatê raşteyan rayîr ra benê. Ma taxê Bagcilar, Beyoglu û Sultanbeylî ke cinîyê kurdî ci de zêde ciwîyenê ser qezayê pîlotî weçîna.” 

 

Cinîyê kurdî bi ziwanê xo eşkenê xo biresnê mekanîzmayan? 

 

Newroze dîyar kerd ke seba ke problemê xoresnayîşê mekanîzmayê têkoşînê vera şîdetî bikerê rojev û bikerê rapor na xebate dayî destpêkerdiş û wina dewam kerd: “Ma ewil Beyoglu û Bagcilarî ra dest pêkerd. Nika Sultaybelî de dewam kena. Şîdet her ca de est o. Nê taxan ke mi rêz kerdî zî est ê. Na xebate ma rê bî hêvî. Cinî hem dewlete û hem zî camêrd ra şîdet vînena. Cinîyê kurdî bi ziwanê xo nêeşkenê xo biresnê mekanîzmayan. Coka ra ma xebatêka winasî da destpêkerdiş. Cinîyê kurdî bi dewlete û mekanîzmayê dewlete ra bawer nêkenê. Xebatan de cinîyan vatêne ‘na xebate xeylê ercaye ya. La ma bi mekanîzmayê fermî bawer nêkenê.’ Coka ra zî xebata rêxistinê cinîyan û dezgeha xeylê muhîm a. Xebata ma do bi raporê 8ê Adare ke bêra weşanayîş peynî biba.” 

 

Semedê 25ê Teşrîna Peyêne vengdayîş 

 

Newroze qiseykerdişê xo yê peyênan de venga heme cinîyan kerd ke 25ê Teşrîna Peyêne de raşteyan de bê û vera şîdetî de vengê xo berz bikerê û vat: “Ma do bi heme cinîyan reyde raşteyan de bê. Ma heme cinîyan pawenê raşteyan. Bi sloganê ‘jin jiyan azadî’ ma do roja şeme saet 16.00î de Mecidîyekoyî de bê.”