Nazlican Nûjîn Yildiz

 

ÎZMÎR - Avûkate Sena Yazibagliye dîyar kerd ke dewayê qetilkerdişê cinîyan de nizdîbîyayîşê heyetê mehkema, kerdox û avûkatan yew o û vat: “Cayo ke tede bêcezaverdayîş bibo de tebîî do edalet çinî bo. Ma do hem raşteyê huqûq û hem zî raşteyan de têkoşînê xo dewam bikerê. 

 

Cinî bi wesîleya 25ê Teşrîna Peyêne Roja Têkoşînê Vera Şîdetê Serê Cinîyan de vengê xo berz kenê û raşteyan de têkoşîn kenê. Yew raşteyê ke cinî vera nê caardişan de têkoşîn kenê, nizdîbîyayîşê hukmî yo ke kerdoxan bêceza verdeno yo. Avûkate Sena Yazibagliye derheqê babete de qisey kerd. 

Pawitişê manenê yewbînan 

 

Senaye ard ziwan ke mehkema de pawitişê kerdoxan menenê yewbînan û wina vat: “Seke pê kerdê û pawitişê hempar danê. Qetilkerdişê cinîyan de babete cayêk ra tepîya aver nêşina. Her tim sey nesne yena dîyîş. Namus, şeref, hasîyet babetê vatişî yê. Camêrd camêrdîya xo gird keno û nê çîyan bahane kenê. Suc qet nîno qebulkerdiş.” 

 

‘Avûkatî zî eynî nizdîbîyayîş de yê’ 

 

Senaye dîyar kerd ke avûkatê kerdoxan de zî manenê înan û dewaya Şule Çete sey nimune mojna û vat: “Avûkatê kerdoxî vat ‘Çi karê aye a saete de bi camêrdêk reyde est o’. Mudafîyê avûkatî vejîya teberê amancê xo. Ewro nuqtaya ke ma tede yê, bedelê giran ameyî dayîş, qezencê ma est ê. La hema rolê cînsîyetê komelî nêameyo wedritiş. Sewbîna nizdîbîyayîşê mehkema zî dewayê qetilkerdişê cinîyan de têduşt o. Eynî nuqta de yê.”

 

‘Nê sîstemî ra edalet nêvejîyeno’ 

 

Senaye dewamê qiseykerdişê xo de da zanaayîş ke qerarê ke mehkema ra vejîyenê ganî tekabulê cayêk tatmînkar ê seba her kesî bikero û vat: “Ma na babete de hewl danê ke vengê wijdanê komelî bidê mojnayîş. Tena vatiş çareserî nêano. Cezaya bi qestî merdimêk kiştiş muebet o. Nê merdimî wexto ke kesêk kişenê zanê ke cezaya ke înan do bigîrê çî ya. La pawitişê xo zî zanê, vanê ‘mi şerefê xo xilas kerd’. No seba înan kişta cezaya ke bigîrê de tu çîyêk nîyo. Coka ra zî nê sîstemê cezakerdişî de edalet mumkun nîyo. Nê semedî ra edalet pê nîno.”

 

'Seba aramî raşteyan de têkoşîn' 

 

Senaye qiseykerdişê xo yê peyênan de ard ziwan ke seba vernîgirewtişî ganî her çî merheleya mektebî ra dest pêbikero û vat: “Ganî dersê cînsîyetê komelî bikewê mufredatan. Fakulteyê huqûqî de problem est ê. Ganî mufredatê uca bêro bedilnayîş. Ma do vera nê çîyan de hem raşteyê huqûqî de û hem zî raşteyê têkoşînî de têkoşînê xo bidê rayîr ra berdiş. Seba aştî û asayîşî ganî ma têkoşîn bikerê û raşteyan de bê.”