Yeşîm Oruç

 

MERKEZÊ XEBERAN - Bi wesîleya 25ê Teşrîna Peyêne Roja Têkoşînê Vera Şîdetê Serê Cinîyan ê Mîyanneteweyî, goreyê çeteleyê 10 aşman ê ajansê ma 287 cinî qetil bîyî û 183 cinî zî bi şik dinyaya xo bedelnayî.

 

Polîtîkayê îqtîdarê AKP-MHPyî ke cinî û tutan hedef gêno seranserê serre de zêdebîyayîşê şîdetî reyde zemîn amade kerd. Serra 2022ine de ke qetilkerdişê cinîyan açarya qirkerdişî dewam kerd, tenê goreyê dayeyê çapemenîye de vejîyayê, cîdîyetê tabloyî vejeno werte. Cinîyê ke têkoşîn û paştdayîşî pîl kenê zî benê hedefê îqtîdarî û camêrdan. Bi taybetî aşma adare de herêmê erdlerzî de şîdetê serê cinî zêde bîyî û semedê kêmîyê mekanîzmayan cinîyan nêeşkayîne vengê xo bidê eşnawitiş. Bi wesîleya 25ê Teşrîna Peyêne Roja Têkoşînê Vera Şîdetê Serê Cinîyan ê Mîyanneteweyî, goreyê çeteleyê 10 aşman ê ajansê ma 287 cinî ameyî qetilkerdiş û 183 cinî zî bi şik dinyaya xo bedelnayî.

 

Şikdarî tewr yê nêzdî yê

 

88 cinî hetê camêrdê ke înan reyde zewicnayebî, 22 cinî hetê camêrdê ke fek veradayî, 26 cinî hetê camêrdê ke sewîyeya fekveradayîşî de yê, 15 cinî hetê lajê xo ra, 22 cinî hetê nasanê xo ra, 8 cinî zî hetê kesê înan ra visyayî, 6 cinî hetê birayê xo ra, 2 cinî hetê pîyê xo ra, 6 cinî zî hetê camêrdê nas nêkenê ra ameyî qetilkerdiş.