Rozerîn Gultekîn

 

ŞIRNEX - Xecê Durake dîyar kerd ke seba cenazeya kênaya xo Ceylan Duraka ke di aşmî yo morg de yena vindarnayîş testê DNAye daya û veng kerd ke ganî bi lezkî netîce bibo û vat: “Hema ma cenaze nêgirewta. Ma bi ‘merasîm mekerê’ tehdît kerdî.” 

 

Ceylan Duraka (Avesta Avaşîn) ke 10 serrî verê cû tewrê PKKyî bî Dêrsim de di aşmî verê cû netîceyê pêrodayîşêk de bi embazanê xo reyde dinyaya xo bedilnaye. Keyeyê aye Dêrgulê ya Şirnexî de ciwîyeno û 25 roje verê cû xebere girewt û seba testê DNAye şî nimuneyê gonî da. 15 roje verê cû verê ke xebere bidê keye cenaze wedarnayî morgê Nêweşxaneyê Dewlete yê Tuncelî. Ame zanayîş ke cenaze 50 rojî yo morg de yena vindarnayîş. Dadîya Ceylane, Xecê Durake veng kerd ke ganî bi lez proses zelal bibo. 

 

Tehdîdê ‘şima do şîn nêronê’ kerdî 

 

Xecêye da zanayîş ke aşmêke verê cû fermandarê qereqolî înan gêrayo û vato kênaya şima dinyaya xo bedilnaya û vat: “Ma şîyî, hîrê fotograf nîşanê ma dayî. Mi kênaya xo nas kerd. La cenaze nîşanê ma nêdayî. Nimuneyê gonî girewtî. Vatî Ceylane morgê Tuncelî de ya. Ma rê vatî ‘Eke Ceylane biba zî şima do şîn nêronê, şima do merasîm nêvirazê’. A roje ra tepîya xeber nêdayî. Vanê paweyê qerarê dozger û dadgerî vinderê. 25 rojî yo hema xeberêke çin a. Cenazeye 15 rojî verê cû verê ke ma nimuneyê gonî bidê berdî morg.”

 

‘Ceylane nêba zî do kesebaya mi bivêşa’ 

 

Xecêye qiseykerdişê xo yê peyênan de veng kerd û vat: “Vatî Ceylane vera vengê leşkeran ê ‘teslîm ba’ de vata ‘ma teslîmê şima nêbenê’. Waştişê mi no yo ke wa bi lezkî cenaze bêra teslîmkerdiş. Ez bizana ke Ceylane ya ez do aye rê gorêk viraza. Ez do cayê gorê aye bizana. Cenaze aîdê Ceylane nêba zî do kesebaya mi bivêşa.”