Marta Somek-Elfazî Toral

 

STENBOL - Ebru Muhîkanci ya HPGye 22ê teşrîna verêne 2011ine de Colemêrg de bi çekê kîmyewî ameye qetilkerdiş. Dadîya aye Bîrgul Muhîkanci sey dadîya aştîye têkoşînê xo dana destpêkerdiş û waştişê aştîye de israr kena. Bîrgule dîyar kena ke wa dadî cenaze, kefen û goran verike nêkerê, tutanê xo bikerê verike û venga cinîyan kerd ke her kes semedê aştîye têkoşîn bikero.

 

22ê teşrîna verêne 2011ine de Kazan Vadîsî yê Colemêrgî de 36 gerîla bi çekê kîmyewî ameyî qetilkerdiş. Nînan ra yewe zî Ebru Muhîkanci (Eylem Ararat) ya HPGyîje bîye. Keyeyê aye ke cenaze berdî Stenbol bi girseyî defin kerdibî. 

 

Dadîya Ebruye, Bîrgul Muhîkanci ke polîtîkayê şerî û qirkerdişî ra nasîbê xo girewta, dimayê qetilkerdişê kênaya xo sey Dadîya Aştîye têkoşînê xo dewam kena.

 

Nasnameyê êzidîtî dewam kenê

 

Bîrgule tutêke keyeyê êzidî û armenî ya. Bîrgule ke hema tute bîye keyeyê aye Agirî de bi ca beno. Pîyê aye her tim nasnameyê êzidîtî dano ciwîyayîş. Bîrgule wina vana: “O wext tedayê dewlete zaf bîyî. Bapîra mi tu wext kokê xo înkar nêkerd. Fek êzidîtî ra vera nêda. Hema ez nêamebîya dinya pîyê mi koçî Îzmîrî keno. Ez uca de ameya dinya. Dima ra yenê Qersî dewe de bi ca benê. Ma pêro uca de pîlî benê. Dewê êzidî, armenî, kurdî û Tirkî estbî. Babî mi zaf ameyîne heskerdiş.”

 

Tepiştiş de îşkence

 

Bîrgule dimayê ke zewicyena, vernê de şinê Îzmîr û dima ra zî şinê Stenbol. Bîrgule wina vana: “Tuta min a ewilî Ebrûye bîye. Îzmîr de ameye dinya. Semedê ekonomî ameye Qers. Ebru 8 serrî bî, ma reyna şîyî Stenbol. Tutê min ê bînî uca de ameyî dinya. Ebruye semedê wendişê unîversîte şî Qers. Serekîya Komeleya Wendekarê Kafkasî kerd. Kênaya mi uca destbend bîye û îşkence kerdî.”

 

Verê xo dana koyan

 

Bîrgule wina vana: “Bi desan rey hêrişê kênaya mi kerdî. Baxçeyê mektebî de hêriş kerdî. Vernîya aye girewtî û vatî ti terorîst a. Ebru kesêke xoverdayox bîye. Zaf jîyatî bîye, welatperwer, hîsgêr û serkewte bîye. Tedayê dewlete qebûl nêkerd. 24ê Hezîrana 2008ine de verê xo da koyan. Wexto ke kênaya mi şî mektubêke mi rê verda bî.”

 

‘Bi çekê kîmyewî amebî parçekerdiş’

 

Bîrgule wina vat: “22ê teşrîna verêne 2011ine de kênaya mi ameye qetilkerdiş. Kênaya mi hîrê serrî û nîme koyan de mend. Ebruye koyê Çîlo de 6 aşmî fermandarî kerd. Ma şîyî Meletî semedê cenazeye aye. Mêrde û birayê mi şî dîyî. Vatî ti meşo meewne. Ma cenaze girewt nêverdayî ma bikerê teyareyî. Ma ambulanse kîra kerd. 34 gerîla bi çekê kîmyewî ameyî qetilkerdiş. Bedenê înan ame parçekerdiş. Xeylêk keyeyî bi aşman verê morgî de vindertî. Tutê înan goristanê bêkesan de amebî definkerdiş. Seke heyf keyeyan ra bigîrê, dej bi keyeyan dayîne ciwîyayîş. Cenazeyan koliyan de şirawitêne.”

 

Sey dadîya aştîye têkoşînê xo dewam kena

 

Bîrgule dîyar kerd ke dimayê ke kênaya xo 5 serran Komeleya Paştdayîşê Kesê Xizmê Xo Vînî Kerdê yê Anatoluyî (ANYAKAYDER) de xebate kerda û vat: “Her roje cenaze yenê. No dejêk pîl o. Dimayê kênaya xo mi mîyanê Dadîyê Aştîye de ca girewt. Mi nêwaşt êdî kezeba dadîyan biveşa. Bi 33 aşmî yo tu agahî serekî ra nîna girewtiş. Serekî ciwanîya xo da serê nê têkoşînî. Bedelê pîlî da. Ma her tim hetê aştîye bîyî. Ma do her tim hetê demokrasî bibê.  Dadîyê aştîye heta peynî vanê aştî. Ez her tim vana aştî. Ez venga dadîyan kena ke wa pêro kesî semedê aştî têkoşîn bikerê. Wa vengê xo berz bikerê.