Elfazî Toral

 

STENBOL - Nuştoxa Kovara Mevzu Esma Yildize dîyar kerd ke kovare de hîkayeyê cinîyê koçberî est ê û vat: “Bi kovare reyde ma lebate kenê ke problemê cinîyê koçberî rojeve de biverdê û heme hîkayeyan biresnê yewbînan. Ma lebate kenê ke paştîdayîşê mabenê cinîyan gird bikerê." 

 

Cinîyê ke welatê sey Nîjerya, Uganda, Gana, Sîerra Leone de problemê ekonomî, sîyasî û komelkî vera verê xo dayî Tirkîya xeylê taxê Stenbolî de mîyanê şert û mêrcê tewr xiraban de lebate kenê ke biciwîyê. Nê cinîyê ke koçber bîyî bi cîyakarî, şîdet, destdergê û sewbîna bi problemê ekonomî, berardiş, komel, sîyasî û huqûqî reyde rî bi rî manenê. Cinîyê ke Kurdistan û Tirkîya de ciwîyenê bi xebatê xo lebate kenê ke paştîdayîşê cinîyanê koçberan bikerê. 

 

Stenbol de cinî û cinîyê ciwanî kom bîyî û bi nameyê ‘Mevzu’ kovarêke hadre kerdî. Cinîyî kovare de bale ancenê serê problemê cinîyanê koçberan. Mevzu 9ê Hezîrane de hûmara xo ya yewine weşanena. Nuştoxê Kovara Mevzu ra Esma Yildize ajansê ma JINNEWSî rê qisey kerd. 

 

Mevzuye de hîkayeyê cinîyanê koçberan 

 

Esmaye da zanayîş ke Mevzu bi formatê kovar û rojnameyî yeno amadekerdiş û wina vat: “Lebate keno ke babetê rojevî biresno. Bi qelema cinîyan lebate keno ke bibo vengê cinîyan. Mevzu lebate keno ke babetê ke nînê dest girewtiş bêrê dest fînayîş. Cinî seba ke îdareyê xo bikera xîret kena ke hem teber de bixebeta û hem zî keye de bixebeta. Xeylê hîkaye est ê ke heta nika nêameyî vatiş. Cinî nê hîkayeyanê xo Mevzu de nusenê.”

 

'Xîret kenê ke probleman rojeve de biverdê’ 

 

Esmaye qiseykerdişê xo de bale ant serê problemê cinîyanê koçberan û vat: “Cinîyê koçberî bi xeylê zehmetîyan reyde yenê rî bi rî û yeno waştiş ke nê cinî tena sereyê xo bimanê û bêrî pelçiqnayîş. Ma xîret kenê ke kişta nê cinîyan de bê û înan tena nêverdê. Ma wazenê ke çîyê ke cinîyê koçberî ciwîyenê wa bivejê rîyê erdî. Kovara ma xîret kena ke paştîdayîşê cinîyan û tutanê koçberan bikera. Ma xîret kenê ke problemê înan rojeve de biverdê û bibê vengê înan.” 

 

Esmaye dewamê qiseykerdişê xo de dîyar kerd ke bi taybetî cinî û tutê ke koçberê wexto ke şirawenê Merkezê Tepîya Şirawitişî uca de hîna zêde raşteyê cuye yenê tengkerdiş û vat: “No sîstem rayîrê heqê cuye ya cinî û tutan gêno. Nê merkezan de mîyanê şert û mercê tewr xiraban de ciwîyenê. Uca de destdergê bi cinîyan kenê û kuyenê. Cuyêka asayîş uca de çin a.”

 

'Ma do têkoşînê xo gird bikerê’ 

 

Esmaye ard ziwan ke kovare de cinî bi xo hîkayayê xo gênê dest û nusenê û wina vat: “Koçberê cinî hîkayeyê xo yê destpêkerdişê raywanîye anê ziwan, dima ra zî çîyê ke Tirkîya de sereyê înan ra derbaz bîyo nusenê. Seba dewamkerdişê têkoşînî û seba paştîdayîşî ma do raywanîya xo dewam bikerê. Nika ez zî nê cinîyan ra hêz gêna û çî zî benê sebebê girdkerdişê paştîdayîş û têkoşînî.”

 

Esma Yildize qiseykerdişê xo yê peyênan de da zanayîş ke cinî û ciwanî qet tena nîyê û wina peynî kerd: “Hîkayeyê cinî, ciwan, kal û pîran Kovara Mevzu de resenê yewbînan. Ma do têkoşînê xo bikerê yew û dewam bikerê.”