Mîdye Miqted

 

HELEB - Camêrdê Akademîya Perwerdeyî yê Helebî ke seba peynîardişê şîdetê serê cinîyan û bedilnayîşê zîhnîyetê pederşahî tewrê perwerdeyî bîbî, wina vatî: “Ma perwerdeyê xo de babetê bedilnayîşê zîhnîyetê pederşahî û vera şîdetê serê cinîyan de vejîyayîş dî. Ma bi perwerdeyî heqê cinîyan nas kerd. Eynî wextî de ganî ma cinîyan rê bibê hetkar û vera şîdetê serê cinîyan de vinderê. Ma do xîret bikerê ke her tim bi cinîyan reyde têkoşînê azadîye bikerê.”

 

Akademîya Perwerdeyî ya Helebî seba peynîkerdişê şîdetê serê cinîyan û bedilnayîşê zîhnîyetê pederşahî tewrê perwerdeyî bîyî. Camêrdê ke tewrê perwerdeyî bîbî wina ercnayîş kerdî: “Ganî ma zî sey camêrdî nê netîceyê ke ma perwerdeyî ra girewt, bikerî xizmetê komelî. O wext ma do bieşkê raştî û keda cinîyan a dest pêkerdişê tarîxî de bi komelî bidê naskerdiş."

 

‘Zîhnîyetê pederşahî nêbedelîyeno, cinî şîdet vînena’ 

 

Endamê Meclîsê Şehîd Cengîzî, Hemîd Nasro derheqê babeta şîdetê serê cinîyan de wina vat: “Ewro babeta şîdetê serê cinîyan, bîya babeta tewr muhîm. Ma sey camêrdî, vatişê xo serê na babete de kenê. Şîdetê serê cinîyan dewam keno. Semedo ke zîhnîyetê pederşahî û zîhnîyet nêbedelîyeno cinî şîdet vînena. Hem tarîx baş nêameyo honayîş û hem zî kêmanîyê babeta tarîxî bena sebebê şîdetê serê cinîyan. Ganî ma camêrdî perwerdeyî bivînê û vera şîdetê serê cinîyan de bibê yew.”

 

Rolê cinîyan ê tarîxî ame pelçiqnayîş 

 

Hemîdî derheqê rolê cinîyan ê destpêkerdişê komelê xozayî de wina vat: “Eke ma tarîxê xo baş nas bikerê û baş biwanê ma do bivînê ke destpêkerdişê tarîxî de û taybetî komelê xozayî de cinîyan rolê tewr muhîm komel de kay kerdî. Cinîyan o wext komel rayîr ra berdêne û têduştî, heskerdiş mîyanê komelî de dayêne awankerdiş. Sewbîna na babete de xeylê berhemê cinîyan est ê. 104 qanûn bi destê cinîyan ame kifşkerdiş. Heme zî girêdayeyê sinc û adetê komelî bî la dima ke dewleta Sumeran ame awankerdiş êdî rolê cinîyan ame pelçiqnayîş û serê cinîyan de îqtîdarî dayî destpêkerdiş. Bi no hawa merdimîye raşte ra wedarîya û o wext ra şîdetê serê cinîyan dîya destpêkerdiş.”

 

'Ganî ma netîceyê perwerdeyî bikerê xizmetê komelî' 

 

Hemîdî bale ant serê netîceyê perwerdeyî û wina dewam kerd: “Kişta perwerdeyîyo ke ma vînenê, ma vînenê ke serê fikirê Raybertîye de ewro reyna cinî ver bi azadîya xo ra şinê. Bi azadbîyayîşê cinîyan reyde do komel zî azad bibo. No zî bi wesîleya fikrê Rayber Abdullah Ocalanî yo. Ganî ma zî sey camêrd nê netîceyê ke ma perwerdeyî ra girewtî, bikerê xizmetê komelî. O wext ma do bieşkê raştî û keda cinîyan ê destpêkerdişê tarîxî de, bi komelî bidî naskerdiş.”

 

'Ma do bi cinîyan reyde têkoşînê azadîye bikerê' 

 

Tewr peynî Nuştoxê Dadî yê Dîwanê Edaletî de Behzet Bilalî zî ajansê ma rê nêrazîbîyayîşê xo yê hemverê şîdetê serê cinîyan ard ziwan û wina vat: “Ma perwerdeyî de babetê bedilnayîşê zîhnîyetê pederşahî û vera şîdetê serê cinîyan de vejîyayîş dî. Ma bi perwerdeyî heqê cinîyan nas kerd. Eynî wextî de ganî ma cinîyan reyde mîyanê hetkarîye de bê û vera şîdetê serê cinîyan de vinderê. Ganî ma zî komelê xo perwerde bikerê ke komel xo nê zîhnîyetê pederşahîye ra bi xelisno û bi cinîyan reyde têkoşînê azadîye bikero. Ma do xîret bikerê ke her tim bi cinîyan reyde têkoşînê azadîye bikerê."