MERKEZÊ XEBERAN – Ame dîyarkerdiş ke Tanzanya de laser û hezaz vera 47 kesan dinyaya xo bedilnaye û 85 kesî zî birîndar bîyî.

 

Welatê Afrîkaya Rojhelatê Tanzanyaye de laser û hezaz qewimîya û netîceyê bobelatî de 47 kesan dinyaya xo bedilnaye û 85 kesî zî birîndar bîyî. Komîserê Herêma Manyaraye Queen Sendîga eşkerayîya ke 3yê teşrîna peyêne de da de dîyar kerd ke mîyanê fikaran de yê û tena kesê ke laser û hezaz de dinyaya xo bedilnayî nê şik est o ke hema binê herre de merdim bibê û vat ke herême de xebatê cigêrayîş û xelisnayîşî dewam kenê. 

 

Sendîka eşkerayîya xo ya derheqê babete de wina vat: “Dermankerdişê 85 kesê ke ameyî xelisnayîş dewam keno; birîndarê bîn zî nêweşxaneyan de ra ameyî vetiş. Hûmara merdeyan vejîyaye 47î.” 

 

Serekê Dewlete Samîa Sûlûhû Hassanî zî mesajê bi dîmen ke hetê Wezîrîya Weşîye ra ameye weşanayîş de dîyar kerd ke dewa Katesh a Herêma Hanangî de 100 keye rijîyayîşê herre de binê hezazî de mendî û vat: “Ma vera nê bobelatî de şaş mendî.”