Rojda Aydin

 

MÛŞ - Tepişteya nêweşe Besra Erola ke nizdîyê 5 serrî yo tepişte ya, vera xeylê nêweşîyê aye est ê zî serbest nîna verdayîş. Keyeyê Besraye da zanayîş ke semedo ke Besraye vata "Ez kiştoxan baş nas kena" serbest nîna verdayîş û heme cehdkerdişê keyeyî bê netîce manenê. 

 

Rewşa tepişteya nêweşe polîtîkayê îqtîdarî vera roj bi roje giran bena. Berdişê nêweşxaneyî bi tena sereyê xo problem o, goreyê metodan nînê tedawîkerdiş, şert û mercê zîndanî zî bi sereyê xo tesîrêk gird tepişteyanê nêweşan ser de virazeno û bi taybetî zî serbestverdayîşê nê tepişteyan zî raporê Dezgehê Tibê Edlî (ATK) yeno taloqkerdiş. 

 

Yew zî nê tepişteyan ra Besra Erola 65 serrî ya û Zîndanê Tepişte ya Cinîyan ê Xarpêtî de 5 serrî yo girewte ya. Besraye vera her tewirê tedaye de xoverdayîşê xo dewam kena.

 

‘Ez kiştoxan baş nas kena’ 

 

Tedaya hemverê keyeyê Besraye hertim dewam kerdo, keye ra xeylê kesî zî heta nika ameyî tepiştiş. Besraya şahidîya xeylê teda û zilmî kerda, 20ê Temmuza 2015î de Qirkerdişê Pîrsûsî yê Rihaye de netîceyê hêrişê bombeyî yê DAIŞî de lajê aye Evrîm Denîzî dinyaya xo bedilneno. Besraye wexto ke cenazeya lajê ci yena definkerdiş qisey kena û vana: “Ez kiştoxê lajê xo baş nas kena.” nê semedî ra derheqê Besraye de şînê ke şîya û eşkerayîyê çapemenîye yê ke tewrê înan bîya kenê bahane û derheqê aye de dewa yena akerdiş. Nê prosesî de lajêk aye zî bi rayîrê telefonî ke dadîya xo ra seba serweşîye gêno kenê bahane. Nê çîyan ra dima Besraye ameye tepiştiş û 11 aşmî yo zîndan de ya. 

 

7 serrî û nîme ceza aye rê ameye birnayîş 

 

Dima ra derheqê Besraye de serê vatişê “Ez kiştoxan baş nas kena” dewa derheqê aye de yena akerdiş. Besraye sereştişê keyeyî de yena destbendkerdiş û yew serrî tepişte mana û dima ra zî tehlîye bî. La dima ra reyna bi bahaneyê “Endamtîya rêxistine” 7 serrî û nîme ceza ci rê yena birnayîş. Besraye birnayîşê cezaye ra dima demêk zîndanê Mûşî de tepişte mende û no nizdîyê 4 serrî yo zî Zîndanê Girewte yê Cinîyan ê Xarpêtî de yena tepiştiş. Besraya ke serra 2019î ra heta nika tepişte ya, no nizdîyê 5 serrî yo tepişte ya. Besraya ke vera teda û bêhuqûqîyê îqtîdarî de sere çewt nêkerd, zîndan de têkoşînê xo dewam kena. 

 

Rewşa aye xirab a 

 

Besraya ke emrê aye 65 serrî yo, xeylê nêweşîyê aye de est ê. Nêweşîyê sey sînuzît, fitiq, dejê çogan û tansîyonî aye de est ê. Tansîyonê dayo çimanê aye ro. Goreyê doktorê Xarpêtî demarê çimê aye xitimîyayî. Tîya ra 2 aşmî verê cû Xarpetî ra berdî nêweşxaneyêk Amedî. La doktorê Amedî vatî ke, “Ma na rewşe de nêeşkenê tu çîyêk bikerê” û nê vatişan ra dima Besraye reyna tepîya benê Xarpêtî. Rewşa Besraye ke ver bi xirabîye ra şina, tedawîya aye baş nîna kerdiş.

 

‘Ganî lezkî bêra veradayîş’ 

 

Besraye derheqê rewşa ci de qisey kerd û vat: "Rewşa aye baş nîya. Her çiqas benê nêweşxane zî tedawîyêke baş nîna kerdiş. Dadîya mi vernîya ke bêra tepiştiş, semedê fitiqê paşta xo emelîyat bîbî. Labelê nika dejê aye reyna destpêkerdo û nêbaş o. Dadîya mi berdê nêweşxane û vatê lazim o emelîyat biba. La dadîya mi zî vata, ‘Ez zîndan de emelîyat nêbena’ û no semed ra qebûl nêkerda. Nê ser de bi tenê derzî dayî paşta aye ro. Roje di, hîrê dermanan wena. Beno ke çimanê xo vînî bikera. Tedawîya aye nîna kerdiş. Nîna veradayîş zî. Semedo ke dadîya mi bêra veradayîş, ma kewtî mîyanê hewldayîşî, labelê bê netîce maneno. Ganî lezkî bêra veradayîş. Wexto ke ma şinê pêvînayîş zî vana şert û mercî nêbaş ê, sey zîndanê bînan o. Dadîya mi bêsûc tepişte ya. Her çiqasî îqtîdar nêvajo zî ma zanenê ke dadîya mi semedê ê vatişê xo tepişyaye.”

 

Lajê aye zî tepişte yo

 

Heto bîn ra tenê Besra nê, eynî wextî de lajê aye Fuat Erol zî zîndan de yo. Fuat zî 14 serrî yo ke tepişte yo, nika Zîndanê Patnosî de yo. Fuatî zî sey dadîya xo pêwa nêweşîya ey est ê nîno veradayîş.