WAN - Cinîyê ke paştîdayîşê çalakîya “Nobeta Edaletî” kenê, dîyar kerdî ke eke Rayberê PKKyî Abdullah Ocalan nêreso azadîya xo do komel zî azad nêbo û vatî: "Ganî seba rijnayîşê tecrîdî yewîye aver bikewa.” 

 

Komeleya Hetkarîya Bi Keyeyanê Tepişteyan û Hukmwerdeyan (TUHAY -DER) bi waştişê azadîya fizîkî ya Rayberê PKKyî Abdullah Ocalanî ke binê tecrîdêk giran de yo û seba paştîdayîşê kampanyaya ke bi sloganê “Abdullah Ocalanî rê azadî û problemê kurdî rê çareserîya sîyasî” yê grevê vêşanîye ke hetê tepişteyan ra 27ê Teşrîna Peyêne de dîyabî destpêkerdiş, Amed, Wan, Edene û Mersîn de dest bi “Nobeda Edaletî” kerd. Paştîdayîşê hemverê çalakîye her ke şino gird beno. 

 

Cinîyê ke paştîdayîşê çalakîya "Nobeta Edaletî" ya Wanî kerdî ajansê ma JINNEWSî rê qisey kerdî û venga yewîtîye kerdî.

‘Azadîya ma girêdayeyê Serekatî ya’ 

 

Dadîya Aştîye Rabîa Algore tecrîdo ke Îmrali û heme zîndanan de yeno rayîr ra berdiş şermezar kerd û ard ziwan ke bi serran o ê waştişê wedaritişê tecrîdî kenê. Rabîaye ard ziwan ke ê waştişê xo de bi israr ê û wina vat: “Wa tecrîdê serê Serekî bêro wedaritiş û tepişteyê ma nêkewê çalakîya grevê vêşanîye. Xora tedayê girdî serê tepişteyan de yenê rayîr ra berdiş. Ewro tena yew tepişteyêk nê, bi hezaran tepişteyî dest bi çalakîya grevê vêşanîye kerdî. Tîya ra di hirî serrî verê cû reyna çalakîya grevê vêşanîye dest pêkerdbî. Tepişteyê ma ke kewtî grevê vêşanîye seba ma xeylê zor û zehmetîyan ancenê. Şaro ercaye û bi şeref, wa biwirzo payan ser. Ê tutê ma hemeyan ê ke kewtî grevê vêşanîye. Êdî bes o, wa tecrîd wedarîyo. Ez xoverdayîşê tepişteyan silam kena. Ma nêeşkenê Birêz Ocalanî ra tu xeberêke bigîrê. Bêedaletîya bîyaye vera ma nêeşkenê xeber bigîrê. Heme dewletî çim û goşanê xo girewtî. Azadîya ma girêdayeyê Serekî ya.”

 

‘Serek azad bikerê azadî dest bifînê' 

 

Dadîya tepişteyo bi nameyê Nazmî Aydinî ke Zîndanê Girewte yê Tîpê Tyî yê Antalya de tepişte yo, Zelîha Aydine zî da zanayîş ke lajê aye 7 serrî yo tepişte yo û vat ke lajê aye zî kewto çalakîya grevê vêşanîye. Zelîhaye çalakîya tepişteyan silam kerd û vat ke lajê xo vera sereberz a û wina dewam kerd: “Ma wazenê bi lezkî tecrîdê serê Serekatî bêro wedaritiş û bireso azadîya xo. Eke ma Serek azad bikerê ma do azadîye zî dest bifînê.”

 

 

‘Ma do bi yewîye Serek azad bikerê’ 

 

Îdarekara Partîya Demokratîke ya Şaran (HDP) a Rayîrê Armûşî Macîde Varhane zî da zanayîş ke ê seba paştîdayîşê zîndanan bikerê, dest bi çalakîya "Nobeta Edaletî" kerdî û vat ke ê tecrîdo ke bi serran o ameyo girankerdiş qebûl nêkenê. Macîdeye dîyar kerd ke ê do vera tecrîdî de bêveng nêmanê û wina dewam kerd: “Ma seba ke tecrîdê serê Serek wedarîyo û paştîdayîşê tepişteyanê xo bikerê ameyî tîya. Ma tepişteyanê xo tena nêverdenê û wirzêne payan ser. Eke ma wirzî payan ser û bibê yew ma do ser bikewê. Heta ke ma tecrîdê serê Serekatî nêşiknê ma do timî binê tecrîdî de bê. Venga mi heme şarê ma rê yo ke wirzê payan ser û vengê xo berz bikerê. Ma na bêvengîya teberî bişiknê û vajê êdî bes o. Ma heta yewîya xo awan nêkerê ma do nêeşkê tecrîdî zî bişiknê. Coka ra venga mi no yo ke bêrê ma yewîya xo awan bikerê û tecrîd bişiknê. Ma tepiştiş û destbendkerdişan ra nêtersenê. Eke ma bibê yew ê do ma ra bitersê. Semedo ke ma ra tersenê nê tecrîdî hende serrî giran kerdî. Ma do bi yewîye Serek azad bikerê.”