STENBOL - Endama Pîreboka Kampusî Seçîl Murtazaogluye da zanayîş ke polîtîkayê îqtîdarî vera ciwan vejîyenê teberê welatî û vat ke do vera nê de atolye pê bêrê û zîhnîyetê femînîstî gird bikerê. Seçîle nê çîyan ard ziwan: “Amancê dewlete no yo ke karkerê newe bîyara û keda merdiman binpay bikera. Ciwan nê polîtîkayê dewlete vera şinê teberê welat. Coka ra ma bi cinîyan reyde atolyeyan de yenê têkişt û wazenê zîhnîyetê femînîst aver berê. Ma venga heme cinîyan kenê ke bivejê raşteyan û serrewedarnayîşî berz bikerê.” 

 

Polîtîkayê dişmenîye yê îqtîdarî vera raşteyê cuya cinîyan her ke şino teng beno. Bi taybetî wendekarê unîversîteye demê peyênan de problemanê girdan ciwîyenê û îhmalkarîya îqtîdarî vera rayîrê problemê cidî abeno. Wendekarî starbîyayîşî ra bigêrê heta wendiş û îdareyî, xeylê babetan de fikaran ciwîyenê û bêhêvîyêk gird est o. Bi nê probleman reyde wendekar xo rê rayîrêk nêvînenê û cuya xo peynî kenê, bi şikin dinyaya xo vînî kenê. Aşma verêne de qezaya Efelerîy a Aydinî de Wargehê Guzel Hîsar ê Cinîyan de wendekara bi nameyê Zeren Ertaşe netîceyê kewtişê asansorî de dinyaya xo bedelnaye. Dima ra zî xeylê wendekarî bi şikin dinyaya xo bedilnayî. Dimayê ci zî her cayê Tirkîya de wendekar weriştî serê payan û vera probleman de têkoşîn kerdî. 

 

Endama Pîreboka Kampusî Seçîl Murtazaogluye derheqê problemê wargehan ke yenê ciwîyayîş de JINNEWSî rê ercnayîş kerd. 

 

Problemê wendekaran nêqedîyenê! 

 

Seçîle ard ziwan ke cinî ûnîversîteyan de vera şîdetê camêrd-dewlete de xo bi rêxistin kenê û vera heme polîtîkayê hêrişê îqtîdarî de çalakî û aktîvîteyan rayîr ra benê. Seçîle wina vat: “Ma ciwanî vera polîtîkayê îqtîdarî de haydar ê. Ma zanê ke dewlete wazena çi bi ma bida kerdiş. Ma zanê ke dewlete bi polîtîkayanê xo ciwanan ver bi bêhêvîye ra bena. Dimayê cînayetê Zeren Ertaşe xeylê problemî ameyî rojeve. Yew serrî de asansorê ke nêameyî viraştiş est ê. Wargehan de werdî xirab ê. Bi serran o wendekarî bi jehrbîyayîşî reyde rî bi rî yê. Ciwanê unîversîteye demêk dergo ke probleman ciwîyenê.”

 

‘Ciwanî polîtîkayan qebûl nêkenê’ 

 

Seçîle dewam de wina vat: “Dimayê mergê Zerene ma bi rastîyêk ke ma bi mergî reyde rî bî rî yê. Semedê nê zî ciwanî êdî bêveng nêmendî û vejîyayî kuçeyan. Dewlete zî  ferqê nê de ya. Ciwanî yan do bimirê yan zî do biwanê. Semedê nê zî ciwanî êdî her ca de yê. No proses wina nêeşkeno dewam bikero. Ciwanî nê qebûl nêkenê.”

 

‘Ganî ma têkoşîn baş bikerê’ 

 

Seçîle ard ziwan ke muhtewayê sîstemê perwerdeyî ameyo vengkerdiş û nê ercnayîşî kerd: “Amancê dewlete oyo ke karkeranê newe bîyaro û keda ma binpay bikero. Dewlete wazena semedê sermaye, karkeran biresno. Wazena hêzê ma bişikino û ma bê hêvî verdo. Semedê nê zî ciwanî şênê teberê welatî. La têkoşîn tîya eşkeno bêro dayîş û bi têkoşînî eşkeno her çî bêro başkerdiş. Ganî ma cayê ke manenê bi têkoşînê xo her çî bivurnê.” 

 

Hişmendîyê femînîstî bi atolyeyan pîl beno 

 

Seçîle wina qedêna: “Hem mektebî, hem zî her ca de ma do bi cinîyan reyde bêrê têhet û atolyeyan virazênê. Ma hişmendîyê femînîstî aver benê. Ma pêro cinîyan aver benê. Ma têhet de vindenê û benê cewab. Xêrcê ma kesêk ma çin o. Ma venga pêro cinîyan kenê ke ma bêrê têhet û serewedaritişê xo pîl bikerê. Têkoşînê xo pîl bikerê.”