Rabîa Onver

 

COLEMÊRG - Keyeyê tepişteyan çalakîya grevê vêşanîye yê tepişteyan ke çarçeweya kampanyaya “Abdullah Ocalanî rê azadî, seba problemê kurdî çareserî” de dîya destpêkerdiş silam kerdî û vatî: "Ganî bi lezkî Îmraliyî de pêvînayîş bêro kerdiş.” 

 

Raberê PKKyî Abdullah Ocalano ke Îmraliyî de binê tecrîdêk giran de yeno tepiştiş, bi nizdîyê hîrê serrî yo tu xeberêke nîna girewtiş. Tewr peynî 25ê Teşrîna Peyêne ya 2021î de birayê Rayberê PKKyî Abdullah Ocalan, Mehmet Ocalanî bi rayîrê telefonî pêvînayîş kerdibi û pêvînayîş nîme de ameybî birnayîş. Heme muracatê avûkat û keyeyan zî yenê redkerdiş. Bi amancê azdîya fîzîkî ya Abdullah Ocalanî 27ê Teşrîna Peyêne de zîndananê Kurdistan û Tirkîya de bi sloganê “Abdullah Ocalanî rê azadî, seba problemê kurdî çareserî” grevê vêşanîye dîyabî destpêkerdiş û do heta 15ê Sibate grev dewam bikero. Grevê vêşanîye roja 13ine de dewam keno. 

 

Keyeyê tepişteyan ê Colemêrgî ajansê ma JINNEWSî rê qisey kerdî, bale antî serê kampanyaya ke dîyaya destpêkediş û vatî ke ganî bi lezkî pêvînayîş pê bêro. 

 

‘Ez xoverdayîşê tepişteyan pîroz kena’ 

 

Remzîye Yaşare Zîndanê Cinîyan ê Xarpêtî de û Dîlgeş Yaşare zî Zîndanê Beşîkduzu yê Trabzonî de tepişte yê. Mehsîma Yaşare ke dadîya wirdî tepişteyan a, grevê vêşanîye yê zîndanan silam û pîroz kerd û vat: “Ma sey keyeyê tepişteyan do heta peynî kişta tepişteyan de bê. 25 serrî yo Rayberê Şarê Kurdî tepişte yo. Avûkat û keye nêeşkenê şêrê pêvînayîş. Eke rayberê ma ser de tecrîd çinî bo do serê şarê kurdî de zî tecrîd çinî bo. Grev do heta 15ê Sibate dewam bikero. Ez venga şarê kurdî kena ke ma bibê vengê tepişteyan. Her kesê bi wayîrê wijdanê, ganî tepişteyan tena nêverdê. Zîndanan de îradeyêk xurt est o. La ganî ma wayîrê nê hêz û îradeyî bivejê. Tecrîd tena zîndanan de nê serê keyeyan de zî pê yeno. Çi destê kamî ra yeno wa bikero. Ganî vera tecrîdî de bêveng nêmanê.” 

 

‘Wa tecrîd bêro peynîkerdiş’ 

Dadîya tepişteyê bi nameyê Mehdî Mihçi ke Zîndanê Sîlîvrîyî de yeno tepiştiş Gulbeyaz Mihçiye zî da zanayîş ke serê Rayberê PKKyî Abdullah Ocalanî de tecrîdêk giran yeno rayîr ra berdiş û wina dewam kerd: “No tecrîd tesîrê xo serê heme zîndananê Kurdistan û Tirkîya de kerdo. Ma kesê ke benê sebebê tecrîdî şermezar kenê. Her ke ma vanê aştî ê vanê zilm. Her kes vera tecrîdî de bêveng o û çimê xo gêno. Ganî serekatî reyde pêvînayîş bêrê kerdiş û tecrîd bêro şikitiş. Êdî bes o.”

 

‘Ganî bi lezkî pêvînayîş bêro kerdiş' 

 

Gulbeyaze qiseykerdişê xo yê peyênan de bale ant serê azadîya Rayberê PKKyî Abdullah Ocalanî û vat: “Heta serekê ma azad nêbo aştî zî mumkun nîya. Tecrîd sere de bi serekatî dîya destpêkerdiş. Dima ra zîndanan de, serê şarî de û cinîyan ser de vila bî. Nika zîndanan de vera tecrîdî de grevê vêşanîye dîya destpêkerdiş. Ganî ma seba tepişteyan bibê veng. Ganî bi lezkî pêvînayîş pê bêro.”