MERKEZÊ XEBERAN - Grevê vêşanîye yê dore yê tepişteyanê sîyasîyan bi çarçewaya kampanyaya "Abdullah Ocalanî rê azadî, problemê kurdî rê çareserî" dayî destpêkerdiş, roja 13ine de dewam kena. 

 

Semedê wedaritişê tecrîdê giran ê serê Rayberê PKKyî Abdullah Ocalanî û azadîya ci, 27ê Teşrîna Peyêne de tepişteyê sîyasî zîndananê Kurdistan û Tirkîya de dest bi çalakîya grevê vêşanîye yê bidem-dore kerdî. Grevê vêşanîye ewro kewt roja 13ine.

 

Tepişteyê PKK û PAJKî çarçewaya kampanyaya "Abdullah Ocalanî rê azadî, problemê kurdî rê çareserî" 27ê teşrîna peyêne de dayî destpêkerdiş û do 15ê Sibate de peynî bikerê. 

 

Rayberê PKKyî Abdullah Ocalanî 25 serrî Zîndanê Îmraliyî tecrîdî de yeno tepiştiş û 33 aşmî yo zî bi tu hawayî destûr nîno dayîş ke bi keye û avûkatanê xo reyde pêvînayîş bikero.