Şehrîban Aslan

 

AMED - Beste Gokalpe 9 serrî verê cu qezaya Yenîşehîrî ya Amedî de bi şikin dinyaya xo bedelnaye. Dewaya Beste de bi serran o tu averşîyayîşêk çin o. Dadîya aye Nazan Yikilmaz û avûkata aye Asya Cemre Işike roniştişê dewaye ra ver venga paştîdayîşî kerd. 

 

28ê Kanûna 2018î de taxa Ofîs a qezaya Yenîşehîrî ya Amedî de cinîya bi nameyê Beste Gokalpe (19) bi şikin dinyaya xo bedelnaye. Dimayê mergê Besteye Serdozgerîya Komare ya Amedî tehqîqat da destpêkerdiş. Hamza B. û kesê bîn yê ke keyeyî de bî, îfadeyê înan ameybî girewtiş û dima ra serbest ameybî verdayîş. Dozgerî derheqê keso şikin de ‘hetkarîya semedê întîxarî’ îdîaname amade kerd. Îdîaname hetê 6ine Mehkemaya Cezaya Girane ya Amedî ra ame qebûlkerdiş. Dewaya ke ame dîyîş de keso şikin tewrê di roniştişan bî û pawitişê ke her tim hetê kiştoxan ra yenê kerdiş o zî dibare kerd. 

 

Do muhakemekerdiş newe ra bêro kerdiş 

 

Heto bîn de zî her çend ke raporê otopsî de rêçê kuyayîşî bibê zî 6ine Mehkemaya Cezaya Girane ya Amedî raporê Dezgehê Tibê Edlî (ATK) nêwaşt û serra 2018î de derheqê keso şikin de bi bahaneyê delîlî qels ê, qerarê beratî da. Avûkatan qeraro ke ame dayîş berdî îstînafî, aşma êlule de qerar dîya û qerar ame dayîş ke muhakemekerdiş newe ra bêro kerdiş. 

 

Dadîya Besteye, Nazan Yikilmaze, derheqê mergê şikin ê kênaya xo de û prosesê dimayê aye de ercnayîş kerd.

 

‘No cînayetêk cinî yo’ 

 

Nazane dîyar kerd ke wexto ke Beste 16 serî bîya Hamza B. hêrişê cînsî bi Besteye kerdo û o wext Hamza B. 35 serrî bî û wina vat: “Ma Hamza B. îqaz kerd ke bi Beste reyde têkilîya xo bibirno. La heta 19 serrî bi Beste reyde pêvînayîşê înan dewam kerd. Kênaya mi Unîversîteya Stenbolî de wendêne û seba ke rojbîyayîşê aye sernewe de bî Stenbol ra ameye Amed. Roja rojbîyayîşê xo de vat bi embazanê xo reyde partîya rojbîyayîşî kenê. Şî û reyna nêagêra keye. Ez nêzana çi ardî sereyê kênaya mi. La vatî întîxar kerda. Kênaya mi kesêk ke întîxar bikera nêbî. Kênaya mi ameye qetilkerdiş. Rêçê kuyayîşî bedenê aye de estbî. Madem întîxar bî, no merdim hûmara telefonê ma, keyeyê ma zanayêne, qey nêame xeber nêda ma? Serê sibayî saet 07.00î de xeber ame ma rê, vatî kênaya şima morg de ya. Xêrcê nînan kincê ke a roje kênaya mi xora dabî ma yew zî nêdî. Ma nêzanê ke ambulans lez şî yan nê? Derheqê înan çîyan de tu xebera ma çin a. Kam se vano wa bivajo cînayetê cinî yo.”

 

‘Heta edalet bêro ma do têkoşîn bikerê’ 

 

 Nazane qiseykerdişê xo yê peyênan de wina vat: “Tipê Edlî qewîmîyayîş roşn nêkerd. Roniştiş 13ê Kanûne de yo. Rewşa ke qerarêk adilane nêvejîya de yeno fehmkerdiş ke mehkema rewşe nêdîya. Ma na rewşe qet qebûl nêkenê. Heta ke edalet bêro do têkoşînê ma dewam bikero. 10 serrî serê qewimîyayîş ra derbaz bî la têkoşînê ma dewam keno. Ez venga her kesî kena. Wa bibê vengê ma. Êdî bes o. Wa edalet pê bêro. Wa no cînayet roşn bibo. No merdim xeylê tutanê kênayan îstîsmar kerdo. La yew reyêk zî nêameyo destbendkerdiş.” 

 

Semedê roniştişî veng 

 

Avûkata Baroyê Amedî Asya Cemre Işike zî semedê roniştişê 13ê Kanûne veng kerd û wina vat: “Dadîya Besteye xo resna ma û ma dosya ra xeberdar bîyî. Her çend ke muhakemkerdiş ra 10 serrî derbaz bibo zî tu averşîyayîşêk çin o. Tehqîqatêk bi tesîrin nêameyo rayîr ra berdiş. Mergê şikin ê cinîyan de bi bêcezaverdayîşî dosya girewtî. No eşkera yo. Mergê Besteye qet çapemenîye de ca nêgirewto. Coka ra zî rêxistinê cinîyan tewrê roniştişan nêbîyî. Dadîya Beste, Nazane ameye merkezê ma û vat tewrê dosya bibê. Ma zî nê waştişê dadîya Besteye ra dima 13ê Kanûne de saet 09.35î de tewrê roniştişê 6ine Mehkemaya Cezaya Girane ya Amedî bibê. Ma do heme mekanîzmayê huqûqî bişuxilnê. Semedo ke raştî bivejîyo raşte ma venga heme cinîyan, rêxistinê cinîyan û avûkatanê cinî kenê ke a roje de edlîye de bê.”