Oznûr Deger

 

ŞIRNEX - Guler Yanalake ke 8 aşmî digane bî û qedexeyê tebervejîyayîşî yê Cizîrî de hetê polîsan ra bi gulereşnayîşî ameybî birîndarkerdiş û tuta aye ver de şîbî wina vat: “Ez fek dewaya xo ra vera nêdana. Ez bimira zî tutanê xo rê vana wa dewaya mi taqîp bikerê. A roje vîrê înan ra nêşina.” 

 

14ê Kanûna 2015î de qezayê Cizîr û Sîlopîya yê Şirnexî de qedexeyê tebervejîyayîşî ame îlankerdiş û 2yê Adara 2016î de peynî bî. Serê qewimyayîşî ra 8 serrî derbaz bî. 79 rojan qedexeyê tebervejîyayîşî dewam kerd û 288 kes ameyî qetilkerdiş. Tuta 3 aşmê ra bigîrê, heta kesê 70 serrî bi seyan kesî ameyî qetilkerdiş. 8 serrî yo ke hema keyeyê ke cenazeya xo nêgirewtî, est ê. 

 

Nê hemwelatijan ra yew zî Guler Yanalaka (38) ke qedexeyê tebervejîyayîşî de 8 aşme digane bî û 20ê Kanûna 2015î de pey lajê xo yê 3 serrî şîbî teber, ameybî birîndarkerdiş, JINNEWSî rê qalî kerd. 

 

Bi birîndarî lajê xo tepişt 

 

Gulere roja 6ine ya qedexeyê tebervejîyayîşî de verê keyeyê xo de 3 gule erzîyayî pîzeyê aye û bi saetan nêberdî nêweşxane. Gulere derheqê babete de vat: “Lajê mi yê 3 serrî zerre de acizbî. Taxa ma de pêrodayîş çinîbî. Merdim raşteyan de bî. Ez bi lajê xo reyde şîya teber. Ez 8 aşme digane bîya. Mi lajê xo girewt. Ma vat ma şêrê keye. La gule reşênayî mi ser. Guleyê ke reşnayî gina pîze û çaqeyê mi ro. Mi lajê xo na rewşe de zî nêda erd. 200-300 metre keye rê mendbî. Min xo bi zorî eşt zerre.” 

 

‘Bi birîndarî polîsan mi dayî vindarnayîş’ 

 

Gulere eşkera kerd ke tute pîzeyê aye de merde û wina dewam kerd: “Kes çinîbî mi bero nêweşxane. Mi gonî vînî kerd. Di saetan ez keye de vinderta. Ma her ca gêrayî. Polîs û ambulasan zî. La kes nêame. Vatî taxa Nûr de semedo ke pêrodayîş est o, ma nînê. Polîsan vatêne bi îmkananê xo bêrê nuqtaya polîsan. Ma vejîyayî, reyna gule reşênayêne. Faysal Sariyildiz her ca gêra. Bi saetan dima ma bi beyraqa sipî vejîyayî. Polîsan rayîr de di reyan ma da vindarnayîş.” 

 

4 rojan beşê giran de mende 

 

Gulere dîyar kerd ke 4 rojan beşê giran de menda û vat: “Ez di rey amelîyat bîya. Dima ke qedexeyê tebervejîyayîşî temamî wedarîya ma agêrayî keyeyê xo. Ma keyeyê merdimanê xo de mendêne. Ma zaf mexdur bîyî. Problemê girdî ameyî ciwîyayîş. Dimayê birîndarîye mi de problemê weşîye vejîyayî. Dimayê qewimîyayîşî êdî tutê mi nêvirazîya. Ez her tim nêweş a. Ez hema zî tedawî vînena. Hema zî lingê xo baş hîs nêkena. Guleyê ke ginayî çaqeyê mi nizdîyê damarê sînîrî bî. Hîrê gule ginayî mi ro la rapor de vatî di gule.” 

 

‘Min mergan dî, ma do tîya ra tepîya çi bibo?’ 

 

Gulere dewamê qiseykerdişê xo de vat: “Min mergan dî. Ez do tîya ra tepîya se bivîna? Tutê mi verê çimanê mi de bî. Ez verê çimanê înan de birîndar bîya. Dimayê qewimîyayîşî psîkolojîyê tutanê mi xererepîya. Lajê mi yê kişta mi demêk derg nêame serê xo. Qedexeyê tebervejîyayîşî ra ver her kes vatêne do qedexe bêro îlankerdiş. Her kes şîyêne marketan stok kerdêne. Vatêne do 9-10 rojan dewam bikero. Ez digane bîya. Mêrdeyê mi vat semedo ke ma asan şêrê nêweşxane ganî ma bajar ra bivejê. Mi nêwaşt ez şêra. Mi vat ez fek herra xo ra vera nêdana. Beno ke her çî biameyêne sereyê mi. Ez do heta peynî na dewaye taqîp bikera. Ez fek dewaya xo ra vera nêdana. Ez bimra zî tutanê xo rê vana wa dewaya mi taqîp bikerê. Wa ê rojî vîrê înan ra nêşêrê.”