Oznûr Deger

 

MÊRDÎN - Sîyasetmedarê cinî dîyar kerdî ke Rayberê PKKyî Abdullah Ocalano ke 33 aşmî yo ci ra tu xeberêke nîna girewtiş, ganî bi lezkî keye û avûkatanê xo reyde pêvînayîş pê bîyaro. Sîyasetmedaran wina vat: “Şar Îmraliyî ra xeber paweno.” 

 

Tepişteyê sîyasî seba azadîya Rayberê PKKyî Abdullah Ocalanî 27ê Teşrîna Peyêne de dest bi grevê vêşanîye yê dore kerdî û grev dewam keno. 4ê Kanûne de Mudanya de bi girdîya 5.1 erdlerz virazîya û semedo ke Abdullah Ocalanî ra xebere nîya girewtiş şikê merdiman gird bî. Çalakîya tepişteyan bi koma diyîne dewam kena. 

 

Tepişteyan pêvînayîşê bi keye û avûkatanê xo de venga wayîr vejîyayîşê çalakîye danê rayaumûmî.

 

‘Serê şarê kurdî de zilmêk gird est o’ 

 

Îdarekara Partîya Têduştî û Demokrasî (DEM Partî) ya Qoserî Mevlude Çelebîye da zanayîş ke tepiştiş û destbendkerdiş para kurdan kewto û wina vat: “Serê Şarê kurdî de zilmek gird est o û heta ke no zilm nêro şikitiş do dewam bikero. Xeylê sîyasetmedarê ma tepişte yê. Xeylê hemwelatijî tepişte yê. Sebebê pawitişê heqan vera ameyî tepiştiş. Xeylê tepişteyê nêweşî est ê. Ma teber de sey zîndan ciwîyenê. Rewşa tepişteyan tebîî qet şik çin o ke hîna zêde girana û merdiman kena mîyanê şikan.”

 

‘Şar Îmraliyî ra xebere paweno’ 

 

Mevludeye dewamê qiseykerdişê xo de bale ant serê tecrîdê zîndanan û wina vat: “Tepişteyî vera nê zilm û tecrîdî de kewtî grev. Zîndanan de xoverdayîş dewam keno. Ma wazenê veng bidê grevê vêşanîye. Ganî her kes bibo vengê tepişteyan. Tena tepişte nê heme Şarê kurdîKurd û tirkî binê tecrîdî de yê. Bi serran o malumat birêz Abdullah Ocalanî ra nîno girewtiş. Ne keye û ne zî avûkatî nêeşkenê pêvînayîş bikerê. Erdlerz virazîya, ma nêşekayî ci ra xeber bigîrê. Her kes bi fikar o. Ganî dewlete berpirsîyarîya xo bîyara ca. Şar xeberêke paweo. Dewleta ke huqûq, heq û edalet tede çin a, nêeşkena dewam bikera.”

 

‘Ma do çalakîyan dewam bikerê’ 

 

Îdarekara DEM Partîye ya Stewrê Emîne Aydogane zî eşkera kerd ke ganî paştîdayîş bidê çalakîyan û wina dewam kerd: “Rayberê PKKyî Abdullah Ocalan binê tecrîdêk giran de yo. Zîndanan de binpaykerdişê heqan zêde bîyo. Ganî şarê kurdî biherikîyo raşteyan û eşkerayîyan bido. Ganî tepişteyê nêweşî serbest bêrê verdayîş. Heta serekatî serbest nêro verdayîş do têkoşînê ma dewam bikero. Ma wazenê avûkat û keye pêvînayîş bikerê. Ma bi şikin ê.”

 

‘Ganî ma bibê vengê tepişteyan’ 

 

Hemsereka DEM Partîye ya Artukluye Remzîye Abikaye zî bale ant serê tecrîdo ke her ke şino giran beno û ercnayîşê xo wina ard ziwan: “Ganî şarê ma vera tecrîd û grevê vêşanîye de bibo veng. Ganî şar bibo yew û vera na rewşe de îtîraz bikero û pîya têkoşîn bikero.”