Rozerîn Gultekîn

 

AMED - Parlamentera Partîya DEMî Sabahat Erdogane zîyaretê xo yê başûrê Kurdistanî ercnaye û dîyar kerd ke cinî Tirkîya û Başûr de bi eynî zihnîyetî reyde rî bi rî yê û vat: "Pêvînayîşê ma do dewam bikerê." 

 

Heyeto ke parlamenterê Partîya Têduştî û Demokrasîyî yê Şaran (DEM Partî), sîyasetmedar û temsîlkarê dezgehê cinîyan ra pê yeno çarçeweya kampanyaya ke bi sloganê “Bi jin jiyan azadî reyde ver bi azadîye ra” ya Têgêrayîşê Cinîyê Azade (TJA) şî zîyaretê başûrê Kurdistanî. Zîyaretê dezgeh û rêxistinê cinîyan û partîyê sîyasî de hêrişê hemverê cinîyan ame munaqaşakerdiş û planê ameyoxî ame vetiş. 

 

Derheqê zîyaretî de parlamentera Partîya DEMî Sabahat Erdogane ajansê ma JINNEWSî rê qisey kerd û bale ant serê babeta zîyaretî.

 

Sabahate dîyar kerd ke heyetî reyde xeylê zîyaretan pê ardî û babetê sey yewîya cinîyan û yewîya mîyanneteweyî de xeylê pêvînayîş ameyî kerdiş û wina dewam kerd: “Ma bi walîyê Silêmanîye reyde pêvînayîş pê ard. Ma bale ant serê suîkastê hemverê kurdan. Ma bale ant serê zîhnîyeto ke Parîs de qetlîyam pê ard û zîhnîyeto ke Başûr de qetlîyam pê ard û ma vat ke eynî zîhnîyet ê. Sewbîna pêvînayîşanê ma de ma serê babeta şaredarîyan de zî vindertî. Reyna ma bi Şehnaz Îbrahîm Ahmede reyde zî pêvînayîş pê ard. Reyna ma pêvînayîşanê xo de serê babeta prosesî de vindetî û ma bale ant serê hêrişê Dewleta Tirke yê hemverê Başûrî. Ma qiseykerdişanê xo de qala suîkast û hêrişê ke zirar danê kurd û yewîya kurdan. Reyna derheqê hêzkerdişê cinîyê kurdî de zî munaqaşa ameyî kerdiş. Seba ma heme pêvînayîş baş derbaz bîyî.”

 

Eynî problemê cinîyan 

 

Sabahate da zanayîş ke cinîyan û taybet zî RJAKî reyde pêvînayîş pê ardî û dîyar kerd ke zîyaret bi taybetî seba dezgehê cinîyan ameyî kerdiş û problemê ke Başûrê Kurdistanî yenê ciwîyayîş sey problemê pêroyî yê cinîyan ê. Sabahate wina dewam kerd: “Tirkîya de her roje cinî yenê qetilkerdiş. Ma bi tacîz û tecawuzî cinîyan her roje şîyar benê. La ma dî ke no zîhnîyet Başûr de zî vila bîyo. Polîtîkayê uca û tîya manenê yewbînan. Polîtîkayê ke şar, cinî, ciwan, ekonomî û berardişî verê çiman de nêgînê yenê averberdiş. Wexto ke ma proseso ke xeylê çîyî pê şîdet yenê tepisnayîş ra derbaz benê, ma dî ke no çî Başûr de zî eynî yo. Sewbîna ma waşt ke ma serê babetê cinî xo veşênenê, xo kişenê, şîdet bi înan yeno kerdiş û tewr zêde şer ra tesîr benê de bêrê têkişt. No demo ke çar parçeyê Kurdistanî de şer û çinîkerdişê şarê kurdî dewam keno de ma Başûr de zî dî ke cinî çend nê şerî ra xirab tesîr bena. Coka ra ma bi taybetî dezgehê cinîyan reyde pêvînayîş pê ard.” 

 

'Do zîyaretê ma dewam bikerê’ 

 

Sabahate da zanayîş ke rêxistinê cinîyan ê ke bi înan reyde zîyaret pê ardî, vatî ke nê hêrişê PDKyî yê Başûrê Kurdistanî raşt nêvînenê û wina vat: "Vatî ke ê zî no prosesê xirabin ra tesîr bîyî. Qiseykerdişan de ame vatiş ke nizdîbîyayîşêk ke şarî verê çiman de nêgêno û tena menfîetê xo ra ewnîyenê, est o. Na rewşe xizmetê yewîya neteweyî nêkena, xizmetê menfîetanê xo kena. Zîhnîyetê serdest ê camêrd gamê ver bi yewîya neteweyî ra asteng keno. Tîya de ma vernîya rêxistinbîyayîşê cinîyan de bi astengîyan reyde rî bi rî yê, la ma zanê ke tena cayê ma de nê, Rojawan û Rojhelat de zî sîstem yewînan ra cîya nîya. Cinî verê nê heme raybazan de cehd kenê ke kom bibê. Ma qerar da ke na têkilî bêra xurtkerdiş û ma hîna zêde bêrê têkîşt. Zîyaretê ma do dewam bikerê û planê hempar do bêro vetiş. Ma bi çar hukmatanê faşîst ê ke înkar kenê, wazenê ma çinî bikerê û raşteyê cuye ya ma çinî bikerê reyde rî bi rî yê. Vera înan de ganî ma cinî her çar parçeyê Kurdistanî de xo rêxistin bikerê.”