Rojda Aydin

 

MERKEZÊ XEBERAN - 6 cinîyê tepişte yê Zîndanê Girewte yê Cinîyan ê Amedî, rêxistinê komelkî yê sivîlî rê mektub şirawitî û mektuba ke şirawitî de dîyar kerdî ke vera tecrîdî de bêveng mebê û venga rolêk aktîf ke kay bikerê, kerdî. 

 

33 aşmî yo xebere Rayberê PKKyî Abdullah Ocalanî ra nîna girewtiş. Vera heme muracatanê pêvînayîşî yê avûkatan bi bahaneyê ‘dîsîplînî’ yenê redkerdiş, tepişteyê sîyasî yê zîndananê Kurdistan û Tirkîya 27ê Teşrîna Peyêne de seba tewrbîyayîşê hemleya “Azadî Abdullah Ocalanî rê, problemê kurd rê çareserîya sîyasî" dest bi grevê vêşanîye kerdî. Grevê vêşanîye 23 rojî yo dewam keno. Heto bîn de zî bi eynî waştişî Wan, Amed, Mêrsîn, Edene û Stenbol de bi sloganê “Seba edalete ma tecrîdî bişiknê, seba aştîye ma bibê vengê zîndanan” Nobeda Edaletî dîyaya destpêkerdiş. 

 

6 cinîyê bi nameyê Şîlan Yilmaz, Gulî Daşçi, Gulan Elma, Melek Evren, Selma Yilmaz, Perîhan Karaman û Fîlîz Işike yê ke Zîndanê Girewte yê Cinîyan ê Amedî de tepişteyî, seba rêxistinê komelkî yê sivîl mektub şirawitî. Mektube de ame vatiş ke ganî vera tecrîdî de bêveng nêro mendiş û venga rolêk aktîf ke kay bikerê, kerdî. 

 

Mektube de wina ame nuştiş: “Sey heme tepişteyê sîyasî ma zî karê xo de serkewtiş wazenê. Seke şima zî wazenê şarê kurdî têkoşînêk bê hempa rayîr ra beno û bi serran o ma bêdelê çareserîya heqanê xo yê têduştî û azadîye danê. Polîtîkayê çareserkerdişê problemê kurdî ke ewro çimeyê heme problemanê zerre û teberî yê Tirkîya yo welat ver bi bobelatêk cidî yê komelkî, sîyasî, ekonomî û ekolojîye ra berdo. 

 

Ewro serê Rayberê Şarê Kurdî Abdullah Ocalanî de tecrîdêk giran yeno ferzkerdiş. Ocalan mabenê serranê 2013-2015î de pêşnîyar û projeyê xo yê seba çareserîye yê raşteqîn û makul yê seba çareserîya heme problemanê bînan bi taybetî seba problemê kurdî bi selahîyetdaranê dewlete û hukmatî reyde pare kerd. 

 

Prosesê çareserîya Demokratîke hende bi qîmet û muhîm bî ke ganî no proses qurbanê nakokî û şerê îqtîdarê mîyanênî yê dewlete nêbayîne. La çi heyf o ke no proses dima ra ame peynîkerdiş û reyna prosesêk bi gonîn û pêrodayîş dekerde rê rayîr akerd. Heqê cuya bi aştî û însanî yo ke do hemwelatijê Tirkîya bihuyî ra fek ame verdayîş. 

 

Tecrîdo ke Îmraliyî de yeno rayîr ra berdiş êdî heme welat û komelî de vila bîyo. Tena Birêz Ocalan binê nê tecrîdo mûtleq de nîyo. Sewbîna demokrasî, aştî û huqûqê nê welatî zî binê tecrîdî de yê. Hemverê nê tecrîdî de komel bê veng ameyo verdayîş. 

 

Meclîso ke serra 1920î de ame awankerdiş û Mustafa Kemal her çend ke o wext vajo ê do heqanê kurdan bidê zî la wexto ke ma ewnîyenê no 100 serra neweyî ma vînenê ke no problem nêameyo çareserkerdiş. Çareserîye herinda xo daye problemê hîna xorîyan. Birêz Abdullah Ocalan û şarê kurdî bi bedelê ke dayî her tim hetgirê aştîye de bî û hema zî xoverdayîşê xo bi israr dewam kenê. Coka ra bi grevê vêşanîye yê bêdem û bêdorveger ke ewro heme zîndanan de dest pêkerdo û bi waştişê şarî yê çareserîya problem û aştîye ma kewtî prosesêk newe. 

 

Çareserîya problemê kurdî bi azadîya Rayberê Şarê Kurd Birêz Abdullah Ocalanî ra girêdaye yo. Ma hêvî kenê ke şima zî sey rêxistinê komelkî yê sivîl bi heme wezîfe û berpirsîyarîya xo tewrê prosesê tarîxî bibê û çareserîya problemê kurdî de bi hawayêkê aktîf ca bigîrê. Bi na wesîleye ma şima silam kenê û heme xebatê şima yê prosesê newe yê zehmetin de serkewtiş wazenê.”