STENBOL - Cinîyê tepişteyê ke Zîndanê Bakirkoyî ra mesajê sere serrneweyî şirawitî û vatî: "Semedê azadîya fizîkî ya Serekê xo ma dest bi çalakîyan kerd. Serek rûmetê ma yo. Ma do heta peynî rûmetê xo rê wayîr vejîyê. Do serra 2014ine biba serra azadîya şaran. Ma serrneweyê Serek û şarê xo pîroz kenê."

 

33 aşmî yo agahî Rayberê PKKyî Abdullah Ocalanî ra nîna girewtiş. Pêwa ke pêro muracatê pêvînayîşî yê avûkatan bi sebebê “disîplînî” ameyî redkerdiş, tepişteyê sîyasî yê zîndanê Kurdistan û Tirkîya de 27ê Teşrîna Peyêne de semedê tewrbîyayîşê hemleyê “Azadî Abdullah Ocalanî rê, problemê kurdî rê çareserîya sîyasî" dest bi grevê vêşanîye kerdî. Grevê vêşanîye 24 rojî yo dewam keno. Sewbîna semedê paştdayîşê kampanyaye Amed, Wan, Stenbol, Edene û Mêrsîn de zî bi sloganê “Semedê edaletî ma tecrîd bişkinê, semedê aştîye ma bibê vengê zindanan” Nobeta Edaletî ameyî destpêkerdiş. 

 

Cinîyê tepişteyî ke Zîndanê Bakirkoyî de derheqê çalakîya grevê vêşanîye û serrneweyî de mesaj şirawitî. 

 

Mesajê ke tepişteyan ra ame wina yo:

 

"Ma sey tepişteyê PKK û PAJKî yê Bakirkoyî 17ê Teşrîna Peyêne ra nata grevê vêşanîye de yê. Sere de Rayber Apo, şarê ma yo xoverdayox û çalak, sewbîna xoverdayîşê gerila û temamê hevalê ke zindanan de yê silam kenê. Şexsê serekî de wazenê ke bi tecrîdê giran şarê kurdî û destkewtişê Tevgerê Azadîye çin bikerê. Ma bawer ê ke çalakîyê zindanan, ko û şarê ma do nê tecrîdî bişikino. Şarê ma zî zano ke Serek rûmetê ma yo tewr pîl o. Ma do heta peynî rûmetê xo rê wayîr vejîyê. 

 

Ewro dewleta îşxalkere AKP û MHP bi tecrîd wazena sere de şarê kurdî û şarê ereb, armenî, suryanî û elewî û ûsn. çin bihesibna û heqê înan yê tewr meşrû  destê înan da bigîra. No tecrîdê serê Girawa Îmraliyî tecrîdêk serê temamê pêro şaran o. Hemverê nê tecrîdî xoverdayîş yeno manaya xo û temamê merdimayî wayîr vejîyayî. Nê semed ra ma tecrîd şermezar kenê. Ma hêzê xo yê xoverdayîşî Serekî ra gênê. Tu hêz û kerdişê dewleta tirke û faşist nêeşkeno nê xoverdayîşê ma bişikino. Temamê çalakîyê ke semedê azadîya fîzîkî ya Rayber Apo yenê organîzekerdiş, ma silam kenê. Ma bi hêvî û bawer ê ke serra 2024ine do biba serra azadîya şaran û serkewtişê xoverdayîşî. Ma serra newe Serek û temamê şarê xo rê pîroz kenê. 

 

Ma do bi ruhê Apoyî serbikewê. Bijî Serok Apo, yan azadî yan azadî.