ÎZMÎR - Fîgen Şahîna Zîndanê Şakranî de grevê vêşanîye de ya, qiseykerdişê xo yê telefonî yê bi keyeyê xo reyde mesajê, “Na roje do biba roja ma” da.

 

Çalakîyê grevê vêşanîye yê çarçewaya kampanyaya “Abdullah Ocalanî rê azadî, problemê kurdî rê çareserîya siyasî” 27ê Teşrîna Peyêne de zîndanan de amebî destpêkerdiş, dewam kenê.

 

'Kelecanêk pîl est o'

 

Fîgen Şahîna ke Zîndanê Padaye yê Cinîyan ê Şakranî yê, bi telefon keyeyê xo reyde qisey kerd û dîyar kerd ke aye silamanê xo pêro tepişteyê ke grev de yê şirawena û moralê înan ca de yo. Fîgene mesajê xo de nê çî ard ziwan: “Kelecanêk pîl est o. Ma Raybertî, şarê ma yê welatperwer û pêro embazê ma yê ke grev de yê, silamanê xo yê germ pêşkêş kenê. Hevalê ma semedê 'Rayber Apo rê azadî û problemê kurdî rê çareserîya sîyasî' dest bi grevê vêşanîye kerdî. Ma bi Cîhan Oner dir dest bi grevê vêşanîye kerd. Rewşa ma zaf baş a. Pêro zîndanan de na rewşe est a. Ma hem hîsgêr ê û hem zî zerrîya ma yew a. Proses do bi nê bawerî de bêro cewabkerdiş. Bi nê kelecanî silamê xo pêro hevalanê xo yê kedkar û pêro şarê kurdî rê şirawena. Her kesî rê serkewtiş wazena. " Na roje do biba roja ma.