Gulistan Gulmuş

 

AMED - Meryem Soyluye 22 rojî yo serê sibayî dimayê karê keyeyî, bi peyatî kewena rayîr û verê xo dana çalakîya Nobeda Edaletî. Dimayê xoradayîşê pêşmalkê "Tecrîd sucê merdimîye yo" dest bi çalakîya xo kena. Seba Meryeme qerarbîyayîş û netîceyê girewtiş muhîm o û wina vat: "Heta ke ma netîce bigîrê ez do her roje bêra çalakî.”

 

Çarçeweya kampanyaya "Abdullah Ocalan rê azadî, problemê kurdî rê çareserîya sîyasî" ke 10ê Teşrîna Verêne de bi waştişê azadîya fîzîkî ya Rayberê PKKyî Abdullah Ocalanî ke Girawa Îmraliyî de binê tecrîdê giran de yeno tepiştiş dîya destpêkerdiş, 27ê Teşrîna Peyêne de tepişteyê sîyasî seba paştîdayîşê kampanyaye dest bi grevê vêşanîye kerdî. Merdimê tepişteyan zî çarçeweya “Seba edalete ma tecrîdî bişiknê seba aştîye ma bibê vengê zîndanan” Amed, Wan, Mêrsîn, Edene û Stenbol de Nobeda Edaletî dayî destpêkerdiş. 

 

Nobeda Edaletî ya ke hetê Komeleya Hetkarîya bi Keyeyê Tepişteyan reyde (TUAY-DER) û keyeyê tepişteyê ra Amed de dîya destpêkerdiş 21 rojî yo awanîya Partîya Tûduştî û Demokrasîyî (DEM Partîye) ya qezaya Rezan a Amedî de dewam kena. Partîyê sîyasî, dezgeh û rêxistinê cinîyan, dezgehê sivîlî şinê zîyaretê çalakîya Nobeda Edaletî. 

 

Dadîya tepişteya nêweşe ya bi nameyê Amîne Kaya, Meryem Soyluye her roje keyeyê xo ra kewena rayîr û verê xo dana cayê çalakîye. Seba Meryeme êdî xoverdayîş bîyo parçeyêk cuya aye. Coka ra zî çalakîya Nobeda Edaletî sey parçeyêk xo vînena. Roja destpêkerdişê çalakîye ra heta ewro Meryeme mîyanê çalakîye de cayê xo gêna. 

 

Dimayê kare keyeyî vere xo dana çalakîye 

 

Meryeme her serê sibayî sey bi hezaran cinîyan serê sibayî pakîya keyeyî kena û deştêya xo kena. La cîyabîyayîşêk aye est o ke dimayê kar û barê keyeyî saet 10.00-11.00î de keye ra vejîyena verê xo dana DEM Partîye. Çend DEM Partî dûrê keyeyê aye bibo zî bi peyatî şina. Wexto ke resena raşteyê çalakîye pêşmalka serê "Tecrîd sucê merdimîye yo" xora dana û bale ancena serê amacê xoverdayîşê xo. 

 

Bi deyîran amancê xo ana ziwan 

 

Meryeme dimayê xoradayîşê pêşmalke silam dana embazanê xo û kişta înan de ronişena. Dimayê persayîşê rewşa yewbînan dest bi çalakîye kena. Verê zîyaretê dezgehan dadî mabenê xo de kewenê sohbete xorî û derg. Qala rewşa tutanê xo yê tepişteyan kenê. Ge-ge bi sohbetan û ge-ge zî bi deyîran hîsê xo anî ziwan. Wexto ke partîyê sîyasî, dezgeh û komeleyê sivîlî yenê zîyaretê înan qalê amancê çalakîya xo kenê. Wexto ke saete bena 17.00 zî êdî heme dadî mîyan de Meryeme zî pêşmalkê xo vejenê û xatir yewbînan ra wazenê û verê xo danê keyeyê xo. 

 

Ma waşt ke sey ajansê JINNEWSî rojêke Meryeme ke senî derbaz beno bîyarê ziwan. Meryeme ajansê ma rê qisey kerd û hîsê xo yê derheqê amancê çalakîye de ard ziwan. 

 

 Qey Nobeda Edaletî? 

 

Meryeme destpêkerdişê qiseykerdişê xo de wina bale ant serê rewşa kênaya xo û amancê çalakîya xo: "Kênaya mi Amîne zî zîndan de nika grevê vêşanîye de ya. Sewbîna kênaya mi zî nêweş a. Kesek ra emelîyat bîya, nika çimanê xo ra problem ciwîyena. 6-7 aşmî yo ganî randevu bigêra û tedawî biba, la nîna tedawîkerdiş. Seba çi ma dest bi Nobeda Edaletî kerd? Sere de semedê azadîya Rayber Abdullah Ocalanî, semedê tepişteyê nêweşan, pakrewanê xo yê ke bi çekê kîmyewî ameyî qetilkerdiş û dima ra cenazeyê ke nêameyî dayîş. No serpêhatîyê ke yenê kerdiş bi amancê şikinayîşê îradeyê keyeyan o. Tarîx de çin o ke dimayê 20 serran goristanî bêrê texripkerdiş û esteyan berê cayêk nêdîyar de defin bikerê. No qet nîno qebûlkerdiş."

 

 'Ez her cayê dinya de ya' 

 

Meryeme, dîyar kerd ke tu cayê dinya de rayberê şaran demêk derg tepişte nêmanenê û wina vat:  "Abdullah Ocalan tenê rayberê şarêk nîyo, rayberê şarê bindest û Rojhelata Mîyanên o. Bi tepiştişî reyde hewl danê ke şarê kurdî werte ra wedarnê. Vatişê ci yê "Şima nêeşkenê zorê îradeyê ma berê. Ez mîyanê çar dêsan de tepişte ya la her cayê dinya de ya’. No vatişêk muhîm o.”

 

‘Hemverê wahşetî de vajê êdî bes o' 

 

Meryeme, da zanayîş ke ganî Nobetê Edaletî bi her hawayî dewam bikerê û wina vat: "Ganî her kurdî êdî hemverê nê wahşetî vajê êdî bes o. Çalakîya ke ma kenê ercîyaye ya. La semedê çalakîyê bînan ganî şar bivejîyo teber. Cinî, tutî, pîr û kalî ganî tewrê çalakîyan bibê. Na çalakîya ke ma kenê, semedê Rayberê ma ya, tepişteyê nêweşî û tepişteyê bînî xeylêk bi erc o. Eke Rayberê me azad bibo, do Rojhelatê Mîyanên azad bibo. Heta ke ma netîceyêk bigîrê ez o her wext bêrî çalakî. Kesê ke koçberê herra ma bîyê, nika ma ra vanê 'Şima kam ê?' Ma wayîrê na herre yê. Na herre herra ma ya.”

 

Meryem Soylu kam a? 

 

Meryeme Sasonê Êlihî ke qilê Koyê Mareto de ameye dinya. Meryeme dadîya 13 tutan a. Hemverê zextê dewlete û yê feodal fek xoverdayîşê xo ra vera nêda.  Dimayê ke 3 tutû aye tewrê PKKyî bîyî, Meryeme zêdeyêr tewrê têkoşînî bî. La wexto ke Meryeme 68 serrî bî bi îdiayê “Endamîya rêxistine” ameye tepiştiş û 10 serrî zîndan de mende. Dimayê tehliyeyê aye tutê aye Amîne û Mehmet Kaya yenê tepiştiş. 

 

Meryeme badê cû çarçewaya cipersayîşê ke Serdozgerîya Komare ya Amedî hemverê Komeleya Hetgir, Yewbînangirewte, Yewîye û Kulturê bi Keyeyê ke Dewrgûşê Şaristanan de Merdimê xo Vînê Kerdê (MEBYA-DER), 27ê Sibata 2021ine de dabî destpêkerdiş de amebî destbendkerdiş. 2yê Adare de bi Hatun Aslana 71 serrî reyde ameye tepiştiş. Meryeme semedê problemê weşîye roniştişê yewin ê dewaya ke 25ê Gulana 2021 de derheqê ci de amebi akerdiş, ameye veradayîş. Hîrêne roniştişê eynî dewa de zî bi îdiayê "Endamtiya rêxistine" ra 6 serrî û 3 aşmî cezaya zîndanî Meryeme rê ame birnayîş.