MERKEZÊ XEBERAN - Ame zanayîş ke Endama Komelgehê Cinîyanê Azadan ê Rojhelatê Kurdistanî (KJAR) Werîşe Mûradî ke nêzdîyê 5 aşmî yo xebere ci ra nîna girewtiş, zîndanê Evîne ya Tahranî de yena tepiştiş.

 

Komelgehê Cinîyanê Azadan ê Rojhelatê Kurdistanî (KJAR) 26ê Êlule 2023ine de dîyar kerdibi ke roja 1ê Tebaxa 2023ine de endama înan Werîşe Mûradî bi nasnameyê Ciwana Sine, bajarê Sine de hêzê rejîmê Îranî ra ameya remnayîş û aqûbetê aye dîyar nîyo. KJARî venga raporterê NYyî yê Îranî û sazgehê mîyanneteweyî kerd ke semedê zanayîşê aqûbetê Ciwana Sine karê lazimî bêrê kerdiş.

 

Goreyê eşkerayîyêke Torra Heqê Merdiman ê Kurdistanî Werîşe Mûradî nika zîndanê Êvîne yê Tahranî de yena tepiştiş û wextê tepiştişî de keyeyî eşkayo tenê reyke pêvînayîş bikero û rayîr nêameyo dayîş ke avûkatî aye bivînê.

 

Eynî wextî de ame vatiş; “Endama KJARî Werîşe Mûradî dimayê ameye destbendkerdiş, berdîyabî îdareyê Îtalatî yê Sine û nêzdîyê di hewteyan ameya îşkencekerdiş. Peynîya aşma Tebaxe de Werîşe Mûradî Sine ra berdîyaya zîndanê Evîne yê Tahranî.