Rojda Aydin

 

WAN - Wan dde 25 rojî yo dadîyê laciksipî bi sloganê ‘Seba edaletî ma tecrîdî bişiknê seba aştîye ma bibê vengê zîndanan’ vere dayî ‘Nobeda Edaletî’. Hîkayayê her laciksipîyêk est o û raşteyê xoverdayîşî de bi eynî waştişî vengê çalakgeranê grevê vêşanîye berz beno. 

 

9ê Teşrîna Verêne ya 1998î de hemverê Rayberê PKKyî Abdullah Ocalanî de komployêk mîyanneteweyî dest pêkerd û 15ê Sibata 1999î de Ocalan teslîmê Tirkîya ame kerdiş. Rayberê PKKyî a roje ra nata Îmraliyî de binê tecrîdêk giran de yeno tepiştiş. 34 aşmî yo tu xeberêke ci ra nîna girewtiş. Vera tecrîdî û seba azadîya Abdullah Ocalanî 10ê Teşrîna Verêne de 74 merkezanê dinya de bi sloganê "Abdullah Ocalanî rê azadî, probleme kurd rê çareserîya sîyasî" kampanyaye dîya destpêkerdiş.

 

Xeylê welatê Ewropaye de zî rojê wendişê kitabê Abdullah Ocalanî ame organîzekerdiş, xebatê dîplomasîye yê mîyanneteweyî ameyî rayîr ra berdiş, rayîr ra şîyayîş û nobedî ameyî viraştiş. Kişta nê xebatê Ewropaye de Kurdistan û Tirkîya de zî rêze çalakî ameyî kerdiş. 27ê Teşrîna Peyêne de zîndananê Kurdistan û Tirkîya de grevê vêşanîye bi eynî waştişan dîya destpêkerdiş. Bi sloganê “Seba edaletî ma tecrîdî bişiknê seba aştîye ma bibê vengê zîndanan” Wan, Amed, Mêrsîn, Edene, Stenbol û Îzmîr de zî bi eynî amacî çalakîya "Nobeda Edaletî" dîyayî destpêkerdiş. 

 

Dinge nobeda edaletî ta yew zî Wan o. Çalakîya dadîyan roja 25ine de awanîya Partîya Herêmê Demokratîke (DBP) de dewam kena. Her çend ke demserrrê zimistanî bibo zî dadî serd û seqemê zimistanî de her roje vere xo danî awanîya DBPyî û uca de çalakîya xo dewam kenê. Sey çapemenîye ma her roje çalakîya dadîyan taqîp kenê. Dadîyê ke yenê têkişt hêz danê yewbînan û cesarete xo pare kenê. Çalakîya ke 25 rojî yo dest pêkerda bi qerardarîyêk gird dewam kena, zîyaretê ke seba çalakîye yenê kerdiş zî hîna zêde hêz danê dadîyanê xoverdayoxan. 

 

Gelo waştişê nê dadîyan çî yo? Aştîyêke senî û çareserîyêk senî wazenê? Do senî waştiş û vengê xo rayaumûmîye ya dinya de bidê eşnawitiş? Gelo waştişê dadîyan senî yeno peygoşkerdiş? 

 

Hewt serrî ra heta hewtay serrî xeylê meymanê înan dadîyan est ê. Her roje taxêk, qezayêk Wanî, dezgeh û dezgehê sivîl ê cîya yê bajarî yene zîyaretê "Nobeda Edaletî'. Nê zîyaretî yewbînan tepiştiş û yewîye mojnenê. Her zîyaretêk de sloganê “Biciwîyo xoverdayîşê zîndanan” zimeno. 

 

Her dadîyêk ke tewrê "Nobeda Edaletî" bena wayîrê hîkayeyêk a. Dadîyê ke bi serran o seba cuya azade têkoşîn kenê û ewro "Nobeda Edaletî" de waştişê tutanê xo yê tepişteyan anê ziwan. Nê dadîyê xoverdayox ê laçikspî bîyî sembolê têkoşîn û azadîye. Nê dadîyî her çalakî û aktîvîteyî de serkêşîye kenê nika. Çalakîye roja ewilî bi çend kesan dest pêkerd, ewro resaya bi desan dadîyan. Dadîyê xoverdayox û hemwelatijê ke yenê zîyaret, eşkerayî û her qiseykerdişê xo de qala peynîkerdişê tecrîdî kenê. 

 

Elbet çalakîya dadîyan tena bi roniştişî sînorkerde nîya. Çalakîye de waştişî deyîran û şîîran yenê ziwan ser. Ayten Salgur, Eynê Atabay, Sosin Oktay, Fehîme Acar û xeylê dadîyê bîn bi deyîr û klamanê xo reng danî çalakîye. Çalakîye de her dadîyêk vîrardişêk xo yê wexto ke şinê pêvînayîşê tutanê xo yê tepişteyan yewbînan rê pare kenê. Mabenê sohbetan de çend nêro ziwan zî xemgînîya zerrîya înan rîyê înan ra asîyeno, bi huyayîşê xo zî hêvîya xo ya ameyoxî anê ziwan. 

 

Her roje dadîyêk mesajêk ana ziwan. Netîce de her mesaj wayîrê amancî yo. Fehîme Acara ke lajê aye Nacî Acar 8 serrî yo tepişte yo, têkoşînê xo dewam kena û vana "Seba çareserkerdişê problemê kurdî rayîrê azadîye Îmraliyî ra derbaz beno". Sosin Oktaya ke birayê aye zîndan de yo, dîyar kerd ke seba waştişê tepişteyan pê bêrê lazimî bi yewîtîya şaran est a.