WAN - Merdimê tepişteyan ê ke Nobeda Edaletî tepişenê reaksîyon mojnayî hêrişanê serê Rojawanê Kurdistanî û polîtîkayê serê înkarkerdiş û çinîkerdişê kurdan rexne kerdî. Merdimê tepişteyan vatî: “Şer bi heme problemanê komelkî reyde girêdayeyo. Sewbîna bi probleme tecrîdî reyde zî girêdayeyo. Eke tecrîd peynî bibo do şer zî peynî bibo.” 

 

Hêrişê Tirkîya yê vera Rojawanê Kurdistanî yê vera nêweşxane, rezerveyê petrol, raşteyê sîvîl ê cuye bi hawayêkê sîstematîk dewam kenê. Bi hêrişan heta nika xeylê hemwelatijî dinyaya xo bedelnayî û xeylê hemwelatijî zî birîndar bîyî. Îqtîdarê AKPyî hetêk ra şerê Îsraîl-Hamasî vejeno vernî û paştîdayîş dano Fîlîstînî û heto bîn de zî wexto ke babete bena kurd hêrişê xo dewam kena. 23ê Kanûne ra heta nika vera hêrişê serê Rojawanê Kurdistanî reaksîyonê Kurdistan, Tirkîya û raşteyê mîyanneteweyî yê vera hêrişan dewam kenê. 

 

Merdime tepişteyan ê Wanî ke Nobeda Edaletî tepişenê reaksîyon mojnayî hêrişê vera Rojawanê Kurdistanî.

 

'Heta ke ez biciwîya ez do îşkenceyê vera lajê xo vîra nêkera' 

 

Merdimê tepişteyan ra Îran Ergune reaksîyon mojnaye polîtîkayê tecrîdî û wina vat:"Lajê mi Taner Ergun no nizdîyê 8 serrî yo Zîndanê Kalkandere yê Rîzeye de tepişte yo. Polîtîkayê tecrîdî yê serê tepişteyanê ma vera vengê tepişteyan nîno eşnawitiş. Wexto ke eştî keyeyê ma ser de îşkence bi lajê mi kerdî. Heta ke ez biciwîya ez do îşkenceyê ke bi lajê mi ame kerdiş ez do vîra nêkera. Nêverdenê Abdullah Ocalan bi avûkat û keyeyê xo reyde pêvînayîş bikero. Polîtîkayê tecrîdî bi problemê komelî reyde girêdayeyê. Tecrîd biqedîyo do şer zî biqedîyo. Tecrîd biqedîyo ma do pêro azad bibê." 

 

'Bi roje verê Fîlîstînî keweno la şewe zî hêrişê kurdan keno' 

 

Merdime tepişteyan ra Fatma Avciye ard ziwan ke îqtîdar polîtîkayê "dirîtîye" taqîp keno û wina vat: " Bi roje verê Fîlîstînî keweno la şewe zî hêrişê kurdan keno. Zilmê kurdan keno. Wa zilm nêkero, wa nêweşxaneyan nêxerepno, wa hêrişê sîvîlan nêkero. Şarê kurdî her tim serê na herre de ciwîyayo, la ê dima ra ameyî serê na herre û serê na herre de bi ca bîyî. Wa no baş bêro zanayîş; kurdî sey bizmarî na herre de şîyî war. Coka ra çend bimirê zî mumkun nîyo ke herra xo ra dûrî bikewê."

 

'Hêvî kene ke ma bîyayîşê xo înkar bikerê' 

 

Merdime tepişteyan ra tewr peynî Azize Çakire qisey kerd û da zanayîş ke cinî şer nêwazenê û reaksyîon mojna polîtîkayê înkarî yê vera kurdan. Azizeye wina vat: "Tutê ma wexto ke şîyêne unîversîte wendêne bi hêrişê nîjadperestî reyde rî bi rî mendêne. Ziwan û nasnameyê ma yeno înkarkerdiş. Ma nê nizdîbîyayîşî qebûl nêkenê. Çike Homa ma sey kurd awan kerdo. Ganî ma wayîrê nasname û ziwanê xo bivejê. Tutê ma yenê kiştiş, înan tefînenê zîndanan. Wexto ke tutê ma bi kurdî qisey kenê û nusenê înan sûcdar kenê. Lajê mi nizdîyê 9 serrî yo zîndan de tepişte yo. Sûcê tutanê ma no yo ke tena kurd ê. Dewlete ma ra hîna baş zana ke tu sûcê ma çin o. Wazenê ma bîyayîşê xo înkar bikerê la ma nê çîyî qebûl nêkenê."