Pelşîn Çetînkaya

 

AMED – Dimayê grevê vêşanîye yê zîndanan ke bi amancê şikitişê tecrîdê serê Rayberê PKKyî Abdullah Ocalanî dîya destpêkerdiş ra dima 6 bajaran de "Nobeda Edaletî" dîya destpêkerdiş. Cinîyê ke tewrê Nobeda Edaletî bîyî dîyar kerdî ke ê edalet wazenê û vatî dewlete qanûnanê xo binpay kena. 

 

Nizdîyê 3 serrî yo Rayberê PKKyî Abdullah Ocalanî ra xebere nîna girewtiş. Vera nê de 10ê Teşrîna Verêne de hemleya "Abdullah Ocalanî rê azadî problemê kurdî rê çareserî" dîya detspêkerdiş û xeylê merkezanê dinya de bi çalakî û bernameyan hemle dewam kena. Tepişteyê sîyasî zî çarçeweya hemleye de 27ê Teşrîna Peyêne de dest bi grevê vêşanîye yê dorveger kerdî. Merdimê tepişteyan zî bi serkêşîya Komeleya Hetkarîya Keyeyê Tepişteyan (TUAYDER) 6 bajaran de dest bi Nobeda Edaletî kerdî. Çalakî bê mabên dewam kena. 

 

Amed de zî 4ê Kanûne de dest bi grevê vêşanîye ame kerdiş. Sevîm Uzuncan û Sulhîye Saruhane yê ke tewrê çalakîye bîyî derheqê babete de ercnayîş kerdî.

 

‘Ganî tecrîd bi lezkî wirzo’ 

 

Sevîm Uzuncane dîyar kerd ke ganî tecrîdê serê Rayberê PKKyî Abdullah Ocalan û şarê kurdî bêro wedaritiş û wina dewam kerd: “Seba tecrîdê zîndanan û teberî wirzo xeylê çalakî pê yenê. Tepişteyî grevê vêşanîye de yê. Zîndanan de tecrîdêke giran pê yeno. Her ke şino tecrîd vilayê her cayî beno. Tepişteyan ser de zilmêk giran est o. Ma înan eşnawenê û hîsên benê. Kesê tepişte heme tutê ma yê. Her ke şino zilmê dewlete zêde beno.” 

 

Sevîme qiseykerdişê xo yê peyênan de veng kerd ke ganî her kes wirzo payan ser û wina peynî ard: “Ganî her kes wirzo payan ser û bibo yew. Ganî ma vera tecrîdî de venga xo berz bikerê. Ganî dewlete nê tecrîdî hem serê Abdullah Ocalanî û hem zî serê şarê kurdî ra biwirzno.” 

 

‘Dewlete qanûnê xo zî pê nêana’ 

 

Sulhîye Saruhane zî dîyar kerd ke yewine waştişê înan edalet o û wina vat: “Tecrîdê Îmraliyî tesîrêk gird serê heme tepişteyan û komelî de kerdo. Tepişte vera tecrîdî de kewtî grevê vêşanîye. Ganî tecrîdê serê Abdullah Ocalanî bêro wedaritiş. Wa serekatî bi keye û avûkatanê xo reyde pêvînayîş bikero. Senî ke heqê her kesî est o yê înan zî est o. Dewlete vana heq û qanûnê min est ê, wa qanûnan ca bîyara. Dewlete qanûnanê xo pê nêana.”

 

‘Sebebê probleman tecrîd o’ 

 

Sulhîyeye bale ant serê tecrîdî û wina dewam kerd: “Sebebê heme probleman tecrîd o. Tecrîd wirzo do aştî bêra, têduştî bêro û ekonomî baş bibo. Ekonomîya Tirkîya şer rê xebetîyena. Coka ra ma na rewşe de yê. Ez venga her kesî û keyeyê leşkeran, polîsan û şaran kena. Bêrê ma dest bidê yewbînan. Wa kes nêmiro. Wa problemê ma meclis de bêrê qiseykerdiş û çareserkerdiş.”