Oznur Deger

 

ŞIRNEX - Fatma Uyare 4ê Çeleyê 2016î de tewrê di embazê xo reyde Sîlopî de ameye qetilkerdiş. Dadîya Fatmaye, Hatîce Uyare wina vat: "Heta ke ez biciwîya ez do taqîpkarê dewaya kênaya xo biba. Her emrî ra embazê Fatmaye estbî. Xeylê ercaye bî. Aye tena kênaya mi nê kênaya Kurdistanî bî. Wa qet nêra vîrîkerdiş. Ganî her kes dest bido yewbînan û na gonîye bidê vindarnayîş." 

 

14ê Kanûna 2015î de Cizîr û Silopî yê qezayê Şirnexî de qedexeyê tebervejîyayîşî ame îlankerdiş û heta 2yê Adara 2016î qedexe dewam kerd. Nê prosesî de bi seyan kesî ameyî qetilkerdiş. 4ê Çeleyê 2016î de Silopî de hîri sîyasetmedarê cinîyê kurdî Sêvê Demîr, Fatma Uyar û Pakîze Nayire ameyî qetilkeriş. 

 

Cuya Fatma Uyare bi xoverdayîş û têkoşînî derbaz bî û Uyare yew cinîyê xoverdayox ê Kurdistanî bî. Fatmaya ke bi hîrê guleyan ameye qetilkerdiş, vera hêrişê dewlete de qet herra xo nêterikna û hîsê welatperwerî her tim mojnayêne şarê xo. 

 

Fatmaye 27 serrîya xo de ameye qetilkerdiş. Fatmaye 28ê Tebaxa 1988î de dewa Dihokî ya Şirnexî de ameye dinya. 7 way û bira bî. Hema 3 aşmîya xo de tedaya dewlete nas kerd. Bado ke dewa înan yena vengkerdiş keyeyê Fatmaye mecbur maneno ke şêro dewa Mîlga Şantîyê. Di serrî uca de ciwîyenê û dima ra ancî tedaye vera, barê Şirnexî kenê. 

 

5 serran tepişte manena 

 

Fatmaye badê 5 serrî yê perwedehî fek mektebe ra verdana. Serra 2000î de tewrê xebata ciwanan bena. 2009î de hema 21 serrî ya xo de yena tepiştiş. 5 serrî tepişte manena. Serra 2014î de serbest yena verdayîş. Dimayê tepiştişê Fatmaye pîyê aye Reşît Uyar yeno tepiştiş û cezaya muebetî ci rê yena birnayîş. 

 

Tewrê têkoşînê cinîyan bena 

 

Fatmaye dimayê tehlîyebîyayîşî xebata cinîyan de ca gêna û cinîyan rêxistin kena. Heta yena qetilkerdiş binê banê KJAye de xebata xo rayîr ra bena. Prosesê qedexeyê tebervejîyayîşî yo ke 14ê Kanûna 2015î de ame îlankerdiş de yew kesê serkêşan ra bî. Qetilkerdişê xo ra ver embaza xo ya tutîye Felek Çakare rê vana ‘çîyêk zerrîya mi de est o, sanki ez do şehîd biba.’ 

 

Dimayê Fatmaye keye ame hedef girewtiş 

 

Dimayê qetilkerdişê Fatmaye birayê aye rê tehqîqat yeno akerdiş û dadîya aye Hatîce Uyare (50) bi îdîayê endamtîya rêxistine yena tepiştiş. 2 aşmî û 10 rojan tepişte manena. Dadîya Fatmaye, Hatîce Uyare bi wesîleya 8ine serrgêra qetilkerdişê kênaya xo de ajansê ma re qisey kerd.

 

‘Girêdayeyê dewaya xo bî’ 

 

Hatîceye da zanayîş ke serran tu çîyêk nêbedilnayo û wina vat: “Her çend ke serrî derbaz bibê zî kiştoxî nêameyî dîyîş û muhakemekerdiş. Ez heta biciwîya ez do wayîrê têkoşînê Fatmaye biveja. Fatmaye cinîyêk ercaye bî, embazêk ercaye bî. Girêdayeyê dewaya xo bî. Rojêke mi aye rê vat ‘kênaya mi ti nêeşkena nê karî bikera’. Aye mi rê vat ‘dayê ti fehm nêkena nê tam karê mi yo’. Fatmaye cinîyêk raşt û zanaye bî. Fatmaye emrê xo yê şenikîye de dest bi xebatan kerd. Kênaya min çend serrî ra dima kewt zîndan. 9 serrî ceza ci rê birnayî. 5 serrî û hîrî aşman tepişte mende. Her tim raşteyan de bî û xebatan de bî. Wextê qedexeyan Şirnex de bî. Dima ra şîye Sîlopî. Uca de tewrê di embazê xo şehîd kewte.”

 

‘Aye tena kênaya mi nê kênaya heme Kurdistanî ya’ 

 

Hatîceye qiseykerdişê xo wina qedênaye: “Ma dadî yî û dejê ma gird o, birînê ma giran o. Heta ez biciwîya ez do taqîpkara dewaya aye biba. Tena taqîpkara dewaya aye nê ez do taqîpkara dewaya hemayan biba. Ma heme dadî yê. Heme zî zerrîya ma de yê. Fatmaye embaza her kesî bî. Xeylê ercaye bî. Aye tena kênaya mi nê kênaya heme Kurdistanî ya. Wa nêra vîrîkerdiş. Wa her kes dest bido yewbînan û na gonîye bido vindarnayîş. Wa dadî hêsirê çiman nêvarnê. Çimanê mi ra hêsir qet nêvindert.”