Elfazî Toral

 

STENBOL - Çalakîkera Nobeda Edaletî Fatma Yilmaza ke cuya xo bi qerardarîyêke gird ê têkoşînî honaya wina vat: “Ez do heta peynîya cuya xo têkoşîn de ca bigêra. Ez do heta peynîye têkoşîn bikera. Waştişê ma zelal o. Ma wazenê bi lezkî Abdullah Ocalanî ra xebere bêra girewtiş. Ma azadîya fîzîkî ya Ocalanî wazenê. Ma do fek waştişê xo yê aştîye ra nêverdê.” 

 

Yew çalakîkera Nobeda Edaletî ya ke Stenbolî de bi waştişê azadîya fîzîkî ya Abdullah Ocalanî dîya destpêkerdiş, Fatma Yilmaze ya. Fatmaya ke emrê xo yê şenik de têkoşînê cinîye û şarê kurdî nas kerd, xoverdayîşêke bi qerardar rayîr ra bena. 

 

Fatma Hîzanê Bedlîsî de ameya dinya. Hema 7 serrî bîya dadîya aye wextê welidnayîşî de dinyaya xo bedelnaye. 5 serrî ra dima ra pîyê xo vînî kerd. Datê aye ewnîyeno Fatma ra û 14 serrî de Fatma zewecneno. Çar tutê aye est ê. Fatma kişta înan de bi polîtîka û hêrişê dewlete reyde yena rî bi rî. 

 

Kurdistan ra koçê Stenbolî kerd 

 

Fatma dîyar kerd ke ekonomîye vera koçê Stenbolî kerdî û vat: “6 serrî dimayê zewacê mi, ma ameyî Stenbol. Mêrdeyê mi verê ke ma bar bikerê şîbî Stenbol û bi pereyêk kêm xebetîyayêne. Dima ra ma zî tutanê xo reyde ameyî tîya. 29 serrî yo ma Stenbol de yê. 6 serran ma uca de mendî û dima ra ma qerar da ke ma tepîya agêrî dewa xo. La dewlete dewa ma veng kerd, nêverda ma şêrê. Ma bi merdimanê xo reyde dewe ra vejîyayî. Cuya ma zaf zehmet derbaz bî. Ma zaf bêrîya dewa xo, herra xo kenê.” 

 

Têkoşînê 8ê Adare ra heta Newrozan... 

 

Fatmaye dewamê qiseykerdişê xo de ard ziwan: Ez 21 serrî bîya. 8ê Adare bî, mi waşt ke ez şêra çalakî. Mêrdeyê mi destur nêda. Vat meşo, ti şina çi? Mi vat ti nêeşkenê mi rê bibê asteng. Ez werişta şîya. Polîsan her ca tepiştbî. Ma 8ê Adare pîroz kerd. Ez polîsan ra qet nêtersaya. A roje ra dima ez têkoşîn kena. Newrozan ra heta 25ê Teşrîna Peyêne heta 8ê Adare her roje çalakîyan de ca gêna.” 

 

Bîye çalakîkera Nobeda Edaletî 

 

Fatma bale ant serê tedaya şarê kurdî û cinîyan ser û na babete de zî wina ercnayîş kerd: “Mi têkoşînê xo bi qerardarîyêke gird dewam kerd. Ez nika tewrê Nobeda Edaletî bîya. Ez do heta peynîya cuya xo têkoşîn de ca bigêra. Ez do qet sere çewt nêkera. Êdî têkoşîn parçeyêke ma yo. Ma nêeşkenê xo bidê vindarnayîş. Ma bîyî Dadîyê Aştîye. Ma nika Nobeda Edaletî da destpêkerdiş. Ma tîya de têkoşîn kenê. Ma do têkoşînê xo dewam bikerê.”

 

Fatma qiseykerdişê xo yê peyênan de venga azadîya fîzîkî ya Abdullah Ocalanî kerd û wina qiseykerdişê xo peynî kerd: “Mad adî nêwazenê kes bimiro. Waştişê ma zelal o. Wa ne polîs, ne leşker, ne gerîla kes nêmiro. Tirk beno kurd beno wa kes nêmiro. Ma do her tim aştîye bîyarê ziwan. Ez venga her kesî kena. Ma edalet wazenê. Ma fek têkoşînî ra nêverdenê.”