STENBOL - Avûkatanê Buroyê Huqûqî yê Asrînî seba pêvînayîşê bi miwekîlê xo Rayberê PKKyî Abdullah Ocalanî ke 34 aşmî yo tu xebere nîna girewtiş, muracatê Serdozgerîya Komare ya Bursayî û Midûrîyê Zîndanê Îmraliyî kerd. 

 

Avûkatanê Buroyê Huqûqî yê Seserre ra Raziye Ozturk, Rêzan Sarica, Faîk Ozgur Erol ve Mazlûm Dînç seba pêvînayîşê bi Rayberê PKKyî Abdullah Ocalan ke Zîndanê Padayeyê Tîpê Fyî bi Asayîşê Berzî yê Îmraliyî de yeno tepiştiş, Serdozgeriya Komare ya Bursayî û Midûrîyê Zîndanê Îmralî muracat kerd. Heto bîn ra avûkatan, seba pêvînayîşê bi Omer Hayrî Konar, Hamîlî Yildirim û Veysî Aktaş zî hem muracatê dozgerî û hem zî midûrîyê zîndanî kerdî. 

 

Astengkerdişê pêvînayîşî

 

Heqê pêvînayîşî yê Abdullah Ocalanî û her hîrê tepişteyê bînî yê bi keye û avûkatan reyde bi sebebê “cezayê disiplînî” yenê astengkerdiş. Mabêne serranê 2021-2023yî de her yew ci ra 3 aşmî, tewr tay 5 cezayê disiplînî Abdullah Ocalanî û tepişteyê bînan rê ameyî birnayîş û heqê înan ê pêvînayîşî ame astengkerdiş.

 

Pêwa pêro serdayîşî û îtîrazan zî sebebê cezayê disiplînî û hûmara dosyayan bi avûkatan reyde nîna parekerdiş. 

 

Netîceyê serdayîşê avûkatan Bûroyê Huqûqî yê Seserre yê semedê Dadgerîya Înfazî ya Bursayî de, dadgerî dîyar kerd ke 18ê tebaxa 2021î de semedê 3 aşman, 3yê sibata 2022 de semedê 3 aşman, 31ê gulana 2022 de semedê hîrê aşman û 9ê êlule 2022 de zî semedê 3 aşman cezayê disiplînî ameya birnayîş.

 

Qerarê qedexeyê pêvînayîşê bi avûkatan ê tewr peyîn, 31ê teşrîna verêne 2023ine de ame dayîş. Semedo ke demê qerarê qedexeyê 26ê Nîsane de peynî bîne, avûkatê Bûroyê Hiqûqî tê Seserre 6ê teşrîna peyêne 2023ine de semedê pêvînayîşî muracatê Dadgerîya Înfazî ya Bursayî kerd. Dimayê muracatê avûkatan, vejîya werte ke 31ê teşrîna verêne 2023 de reyke bîn semedê 6 aşman qerarê qedexeyê pêvînayîşê bi avûkatan reyde ameyo dayîş.

 

Avûkatan muhtewayê qerarê qedexeyî û nimûneyê dosyaye waştî la dadgerî bi sebebê “asayîşî” no waştiş red kerd.