AMED - Dozgerî, waştişê dewamê tepiştişê rojnamegere Dîcle Muftuoglû ya ke tepişte ya, da.

 

Roniştişê diyîn ê Hemsereka Komeleya Rojnamegeran ê Dîcle Firatî (DFG) û Edîtora Ajansê Mezopotamyaye (MA) Dîcle Muftuoglû ke çarçewaya cipersayîşê Serdozgerîya Komare ya Anqarayî de bi edîtorê MAyî Sedat Yilmaz reyde ameye destbendkerdiş û dima ra ameye tepiştiş 5ine Dadgeha Cezaya Giran ya Amedî de ame kerdiş. Dîcleye bi îdiayê “Endamîya rêxistinê” û “Awankerdişî rêxistine û îdarekerdişê ci” nêzdîyê 9 aşmî yo Zîndanê Cinîyan ê Sîncanî ke la tepişte ya bi SEGBÎSî beşdarê roniştişî bî. Avûkatanê Dîcleye roniştiş de amade bî. 

 

Xêrcê temsîlkarê DFGyî, DÎSK Basin Îş û Komeleya Xebatê Huqûq û Medyayî (MLSA) xeylêk rojnamegerî û temsîlkarê partîyê sîyasî û temsîlkarê sazgehê sivîlî roniştiş taqîb kerdî.

 

‘Serê rojnamegeranê kurdan de teda est a’

 

Dîcle pawitişê xo de wina vat: "3yê Gulane ra nata ez bî 9 aşmî yo tepişte ya. Na dewa de faalîyetê min ê rojnamegerî yenê muhakemekerdiş. Na tablo azadîya çapemenî asteng kena. Na rewşe hem rojnamegeran û hem zî şarî mexdûr kena. Semedo ke ma raştîyan nusenê ma yenê muhakemekerdiş. Xususî zî serê rojnamegeranê kurdan de teda est a. Ez zî nînan ra yew a.”

 

Dozgero ke dimayê beyanê şahid Kerem Gokalp mutalayê xo aşkera kerd, waştişê dewamê tepiştişê Dîcle da.