Gulîstan Gulmuş

 

AMED - Sîyasetmedare Martîna Anderson tecrubeyê tepiştişê xo û tepişteyanê sîyasî yê kurdî ard hemverê yewbînan û derheqê tecrîdî de fikrê xo ard ziwan û vat: “Tecrîdê serê Abdullah Ocalanî problemêk global o.”

 

Têgêrayîşê Cinîyanê Azadan (TJA) 13-14ê Çeleyî de konferansê bi nameyê “Zincîra Bêvengîye: Rijnayîşê Dêsê Dorê Tepişteyanê Sîyasîyan” pê ard û di rojan dewam kerd. Welatê cîya ra cinîyê sîyasetmedarî, huqûqnas, aktîvîst tewrî bî û sewbîna Kurdistan û Tirkîya de zî xeylêk cinî tewrê konferansî bîyî. Konferans de binpaykerdişê heqan ê serê tepişteyan ame munaqeşekerdiş û bi atolyeyê ameyî kerdiş de derheqê problemê ke tepişteyî ciwîyenê de metodê çareserî ameyî munaqeşekerdiş. Yew kesa ke tewrê konferansî bî, sîyasetmedara Îrlandayî Martîna Anderson bîye. Martîna derheqê tecrîdê serê Abdullah Ocalanî û têkoşînê yeno dayîş de qisey kerd.

 

Martîna dîyar kerd ke ganî hemverê bêhuqûqîyê zîndanan hişmendî bêro qezenckerdiş û vat: “Ganî hemverê bêhuqûqî, komel vengê xo berz bikero. Babetêka wina muhîm a ke zîndan ra vejîya teber. Bi no hawa ma derheqê tepişteyan de benê wayîrê zanayîşî. Dinya de xeylêk çî qewimyenê.Gazze, Rojhelatê Mîyanên çi beno ma pêro vînenê. Semedê nê bêrê eşnawitiş û na babete de çîyêk bêro kerdiş hişmendîyêk bêro awankerdiş, ganî ma paştdayîş bidê.”

 

‘Selahîyetdarê tirkan endîşeyan nêvînenê’

 

Martîna dîyar kerd ke Rayberê PKKyî Abdullah Ocalan aktorêk xurt o û vat, tecrîdê serê ey problemêk global o û wina vat: “Verê dinya de çîyêk wina amebî vînayîş? Belfast de dewaya Abdullah Ocalanî baş yena zanayîş. Îrlanda de qanûnêk mîyanneteweyî est o û Îrlanda de semedê fehmî fotografêk ey pîl ame daliqnayîş. Yanî eleqeyêk mîyanneteweyî est o. Dadgeha Heqê Merdiman a Ewropa, Komîsyonê Ewropa û yê bînî fikrê xo dîyar kerdî. Rewşe ameye şermezarkerdiş. La selahîyetdarê tirkan endîşeyan nêvînenê.”

 

‘Abdullah Ocalan çimeyê îlhamî yo’

 

Martîna bale ant tecrîdê serê Abdullah Ocalanî û wina vat: “Girêdayê tecrîdî de serê Abdullah Ocalanî de xeylêk caardişê bêqanûnî est ê. Sey kesêke ke tecrubeyê mi zî est o, tecrîd semedê kesî xeylêk zehmet o. Abdullah Ocalan seranserê dinya de tepişteyê sîyasî yeno vînayîş û semedê paştdayîşê xo bi çimeyê îlhamî. Ez zana ke şarê kurdî bi endîşe yo. Avûkatî nêeşkenê xo biresnê ey. Her cayê dinya de, her wext tepişteyê sîyasî semedê waştişê xo muracatê grevê vêşanîye kenê. Semedê nê canê xo dayê. Demê mi de zî grevê vêşanîye de 10 kesî dinyaya xo bedelnayî. Ez xoverdayîşê zîndanan baş zana.”

 

‘Paştdayîş bidê tecrubeyan û pare bikerê’

 

Martîna wina peynî kerd: “Ma keyeyanê xo ra dûr, zîndanan de dûr de mendêne. Keyeyê ma Îrlanda ra ameyîne Îngîlîstan. Semedo ke ma mecbûr mendêne şêrê welatêk bîn. Rewşa ma şibîyena yewbînan. Eynî rewşe tîya de zî est a. Hîn tepişteyî keyeyanê xo ra zaf dûrî de yê. Keyeyî nêeşkenê şêrê. Ez tecrîdê serê tepişteyanê kurdî hîs kena. Ganî ma paştdayîş de bê û tecrubeyan pare bikerê. Ganî hemverê bêhuqûqîyan komel vengê xo berz bikero. Babetêke wina muhîm a ke zîndan ra vejîyo teber. Bi no hawa ma derheqê tepişteyan de benê wayîrê agahî. Dinya de xeylêk çî qewimîyenê. Gazze, Rojhelatê Mîyanên çi beno ma pêro vînenê. Semedo ke nê bêrê eşnawitiş û na babete de çîyêk bêro kerdiş, fehmêk bêro awankerdiş ma paştdayîş bidê.”