Habîbe Eren

 

BURSA - Bajarê Bursa 20 serrî yo hetê AKPyî ra yeno rayîr ra berdiş. Hemwelatijê Bursa vera polîtîkayê rantî de reaksîyon mojnayî û vanê ke ‘her çî ra ver ganî sîstem bibedelîyo.’ 

 

Bursa çarine bajarê tewr gird ê Tirkîya ya û eynî wext de bajarê sanayî û tekstîlî ya. Roja ke AKP ameyo îqtîdarî zî şaredarîya bajarê girdi ya Bursa deste AKPyî de ya. Bajarêk ke xeylê koç girewto yo û serra 2018î de goreyê dayeyanê Bankaya Îllerî bi mîlyarêk û 73 mîlyonî pereyî şaredarîya tewr deyndar a Tirkîya Bursa ya. 

 

AKP ke Bursa de xeylê xurt bî weçînayîşê serra 2018î de vînîbîyayîşêk xeylê gird cuya û rayê ci se ra 57î ra kewt se ra 45î. Ver bi weçînayîşê herêmî yê 31ê Adare ra hemwelatijê qezaya Nîluferî derheqê rewşa bajarî de, şaredarîyêke senî wazenê û ercnayîşê xo yê nê babetan ser o ma rê qisey kerdî.

 

‘Bursa 20 serran de qedîya’ 

 

Cinîya bi nameye Surreya Bayindirliye da zanayîş ke şaredarîyêke baş de ganî fehmê ‘dizdî’ çinî bo û vat: “Ma şaredarîyê ke dizdî tede çin o û rayîrberê ci durustî wazenê. Yê ke ameyî heme dizd ê. Ma projeyê seba fêdeyê bajarî wazenê. Ma zelalîye wazenê. Nika her ca bîyo beton. Bursa 20 serran de qedîya. Verê cû ma waştêne Bursa de ban bigîrê. La nika merdim nêwazeno biciwîyo. Vera erdlerzî de tedbir nînê girewtiş. Ganî şaredarî vera nê de hîsin biba.”

 

’20 serrî yo tu çîyêk nêbedelîyayo’ 

 

Sureyaye wina peynî ard: “Ma wazenê no sîstem bibedelîyo. Qey merdim nê ferq nêkenê? Ez 10 roje verê cû Almanyaye ra ameya. Awanîyê wina salem, merdiman asayiş de dane hîskerdiş. La ma bi şewe bi ters rakewenê. Ma vanê acaba ma do senî bimirê. Tabî qet şik çin o ke her tim rayan bidê nê hukmatî ê do zî vajî ma xora ma yenê weçînayîş. Çîyêk nîno kerdiş. 20 serrî yo çîyêk nêbedelîyayo. Ganî şertî bêrê başkerdiş.”

 

‘Ma şaredarîyek ke baş rayîr ra bena wazenê’ 

 

Hemwelatija bi nameyê Sevîm Une zî nê çîyan ard ziwan: “Ma şaredarîyêk ke fêdeyê ci ma rê bibo wazenê. Cuye vaye ya. Meaşê teqawitî mirdê ma nêkeno. Ma zehmetîyan ancenê. Seba kal û pîran çîyêk nîno kerdiş. Gamêk nîno eştiş. Ganî şertî bêrê başkerdiş.” 

 

Nacîye Gordelîye dîyar kerd ke ê şaredarîyêk ke her tewirê probleman çareser kenê wazenê û wina dewam kerd: “Qerarê şarî verê çiman de nînê girewtiş. Babete heta ke şina serê kursîyan ronişenê. Dima ra her kes goreyê xo têgêreno.”

 

‘Cayê ke tutî kay bikerê nêmendo’ 

 

Cinîya bi nameyê Selîme Bîrîcîke zî wina vat: “AKP zî CHP zî heme yew ê. Yewine çîyo ke kenî rant o. Vîşêrê rantî çîyêk bîn çin o. Her ca qedênayî. Her ca kerdî awanî. Her ca kerdî beton. Cayêk nêverdayî. Cayê ke tutî kay bikerê nêmendo. Cayê ke merdim wesayîtê xo park bikero nêmendo. Gelo ma kam ca de ciwîyenê. Koyan qedênayî. Heta Uludagî awanî viraştî. Dewî nêmendî. Zeytun, încîrî, nêmendî. Wa kes kesî nêxapêno. Heme yewbînan ra xirab ê. Ma şaredarîyan de rant nê xizmet wazenê. Wa nêdiznê, talan nêkerê, çim nêverdê, bêusûsî nêkerê. Şaredarî qisey kenî la xizmet çin o.” 

 

Cinîya bi nameyê Nesrîn Yilmaze zî ard ziwan ke aye her babete de zehmetîyan ancena û vat şaredarî baş nêxebetîyenê, rayîr nînê asfaltkerdiş û lambe nînê ronayîş. Nesrîne vat ke şar şaredarîya ke problemanê înan goşdarî kena wazenê. 

 

‘Waştişê ma nînê ca’ 

 

Semra Guvene zî ard ziwan ke waştişê înan nînê caardiş û wina dewam kerd: “Şar vayeyan û cuye ra gerreyin o. Ma berardoxkar ê û şertê ma zehmetin ê. Ma bi serran o feqîr ê. Ma nêeşkenê derman, gubre bigîrê. Seba citkaran paştîdayîş nîno dayîş. Ma paştîdayîşê mazot û gubre wazenê.”

 

‘Ma semedê ameyoxê xo qesawet de yê’

 

Cinîya bi nameyê Ayşegul Alkaf zî bale ant serê rewşa ciwanan û vat ke rewşa ciwanan goreyê verê tewr zêde xira bîya û vat: “Ma nêeşkenê lazimîyê xo bigîrê. Nê semed ra ma semedê ameyoxî qesawet de yê. Yew aktîvîteyêke komelî, kulturî çin a. Festîvalî yenê qedexekerdiş. La ganî dewlete paştdayîş bidayîne. Ma nêeşkenê lazimîyê xo yê sereyîn bigîrê. No semed ra ameyoxê ma tarî yo.”