Marta Somek

 

STENBOL - Endama Înîsiyatîfê Dadîyanê Aştîye û Dadîyê Şemeyî Emîne Erbeke 18 serrî yo semedê pîyê xo yo ke 1996î de Basaye de ame qetilkerdiş Raşteyê Galatasarayî de ronişena. Emîneye wina vat: “Her ca de qetilkerdiş, merd, vînîkerdiş. Êdî bes o. Pîyê mi ame kiştiş, veşênayî. Ez nêwazena pîyê kesî bêro veşênayîş û qetilkerdiş. Heta peynîya cuya xo ez do Galatasara de biba. Ez do aqûbetê pîyê xo bigêra, edalet biwaza.” 

 

Cinîyê kurdî serra 1996î de serê lazimîyê şert û mercê şerê ê wextî ke awan kerdbî Însîyatîfê Dadîyê Aştîye awan kerdî. Dadîyan her cayê Kurdistan û Tirkîya de seba aştîye xîret kerdî, têkoşîn rayîr ra berdî. Vera heme teda, tepiştiş û destbendkerdişan têkoşînê înan bê maben dewam keno. 

 

Dadîyê Şemeyî nê têkoşînî de bi israr ca girewtî û 29 serrî verê cû seba cigêrayîşê edaletî Raşteyê Galatasarayî de dest bi çalakîya roniştişî kerdî. Dadîyî çalakîya xo ya ewile ra nata vera heme tedayan fek waştişê xo yê têkoşînî ra nêverdenê. 

 

Esteyê merdimanê xo gêrenê 

 

Dadîyê Şemeyî pêroyê dinya de hetê polîsan ra ameyî derbkerdiş û şîdet înan rê ame kerdiş. La vera heme caardişan de dadîyî fek têkoşînê xo ra nêverdayî. Dadîyî têkoşînê xo bi qerardarî dewam kenê. 

 

Şirnex ra heta Stenbolî têkoşîn 

 

Emîne Erbeke wexto ke hema şenik bîya pîyê aye û datê aye ameyî qetilkerdiş û veşênayîş. Pîyê Emîneye Ahmet Kaya û datê aye Halît Kaya 28 serrî verê cû Basa ya Şirnexî de ameyî destbendkerdiş û mînîbusêke de bi 11 kesî reyde ameyî veşênayîş û qetilkerdiş. Emîneye seba ke kerdoxî bêrê muhakemekerdiş bi serran o Raşteyê Galatasarayî de çalakîye de ya. 

 

Endama Înîsiyatîfê Dadîyanê Aştîye û Dadîyê Şemeyî Emîne Erbeke derheqê têkoşîno ke rayîr ra bena de JINNEWSî rê qisey kerd. 

 

Cenazeya pîyê aye nêdayî

 

Emîneye dîyar kerd ke sey dadîya Aştîye û Şemeyî Raşteyê Galatasaraye de ronişena û vat: “28 serrî yo nê raşteyî de ez semedê pîyê xo ronişena. Seba edalet ronişena la edalet çin o. Wa kes nero qetilkerdiş. Gelo do hema çend kes bimirê? Ma têduştî wazenê. Ê vanê merg. Êdî bes o. Qetilkerdiş çareserî nîyo. Ma aştî û edalet wazenê. Cenazeya pîyê mi, datê mi û 6 kesî 4-5 rojan erd de mend. Qorîcîyan înfaz kerdbî, vatî PKK kerdo. Adirbest îlan kerdî. Cenaze zî nêdayî.”

 

6 cenazeyî veşnabî kerdibî çewal 

 

Emîne da zanayîş ke 10 serran semedê cenazeyan muracat kerd û wina vat: “2006 de ma cenaze vet. 10 serrî dima vatî bêveng defin bikerê. Cenazeyî çewalan de bî. Ma bi destê xo vet, ma kefen derzna. Ma Basa cenaze dî. Semedo ke kurdî bî îşkence înan rê ame kerdiş. Çira edalet nîno? Na dewlete de her kesî rê edalet est o, çira kurdan rê çin o. Her cayî de qetilkerdiş, merdiş vînîkerdiş est o. Gelo do heta ça dewam bikero. No dejo ke ma ciwîyayî, wa kes nêciwîyo. Her reya roportaj dana ez yena destbendkerdiş. 9ê Çele de roniştişê mi estbî. Ez veng dana ke wa nê îşkenceyê serê kurdan peynî bê.” 

 

18 serrî yo Galatasarayî de ronişnena 

 

Emîne wina qedêna: “Ma edalet gêrenê. Aştî û edalet zehmet o. Semedo ke aştî û edalet nêro, qisey nêkenê. Ma hamnanî û zimistanî Galatasarayî de ronişenê. Wexto ke qij bîya, bi hêvîya ke pîyê xo bivînî şîne Galatasarayî. Ma zaf dej ant. Wa nêro sereyê kesî. Merg çareserî nîyo. Wa çareserî, aştî û yewî pê bêro. Ma fek têkoşînê xo vera nêdanê. Heta peynîya cuya xo ez o  aqûbetê pîyê xo ra bipersî. Ez o edalet biwazî.”