Zelal Tunç

 

WAN - Wanijan ke seba weçînayîşê herêmî namzetê xo bi verweçînayîşî dîyar kerdî, vanê ke hedefê înan no yo ke qeyûman bierşawê û wina vatî: “Pîrozkerdişê ma yê esasî 1ê Nîsane de yo.” 

 

Weçînayîşê herêmî ke do 31ê Adare de bêro kerdiş rê xebatê partîyê sîyasî dewam kenê. Partîya Têduştî û Demokrasîyî yê Şaran (DEM Partî) bi ‘temsîlkarî nê çîyo raşt demokrasî yo’ namzetê xo bi verweçînayîşêk dîyar kerd. 100 delege 13-14 Çeleyî de ra nata merkez û qezayan de seba namzetîyê hemşaredarîye û netîceyê meclîsî dîyar bikerê, şinê serê sindoqan. Tay bajaran de dimayê weçînayîşan namzed ameyî dîyarkerdiş, tay cayî mendî turê diyîne û vizêr û ewro sindoq ameyî ronayîş. 

 

Yew bajarê ke DEM Partî namzetê hemşaredarîye tede dîyar kerd Wan û qezayê ci yo. Verweçînayîşo ke ame kerdiş de sey namzetê hemşaredarê bajarê girdê yê Wanî Neslîhan Şedal û Abdullah Zeydan ameyî dîyarkerdiş. Artemîtî de namzet Rabîa Başak Koç û Cemîl Kom, Rayîrê Armuşî de Canan Uzunay û Cevdet Altindag, Tuşba de Haîm Akkuş û Umît Keser ameyî dîyarkerdiş. Tay qezayan de netîceyê temayulî de namzetê hemşaredarîye ameyî dîyarkerdiş. 

 

Hemwelatijê Wanî derheqê weçînayîş û namzetan de qisey kerdî. 

 

Amancê înan no yo ke qeyûm bişîrawê

 

Behîce Abîye ya ke şina falîyetê kultur, huner, komelî yê Merkezê Kulturê Nuda ya ke Partîya Aştî û Demokrasî (DBP) dimayê weçînayîşê 2014î de Xaçortî de awan kerdbî, wina vat: “Embazê ma yê namzedî heme zî kede dayî. Netîceyê weçînayîşê tîya yê ke ameyî kerdiş de do namzetê bînî zî bêrê dîyarkerdiş û pîya do xebate bêrê rayîr ra berdiş. La amancê ma no yo ke ma 31ê Adare de qeyûman bişirawê. Pîrozkerdişê ma yê esasî do 1ê Nîsane de bibo.” 

 

Xizmet nêdîya ma 

 

Behîceye ard ziwan ke weçînayîşê 2019î de her çend ke dayeyêk gird ê rayan bi dest bifînî zî bi bahaneyê KHKyî ne mazbataya namzetê HDPyî ameyî dayîş û ne zî dîya partîya diyîne AKPyî. Behîceye wina vat: “Vera ke tu xizmetêk nêkerdî zî xebatê ma xesp kerdî. Girewtî. Hedefê ma yê esasî no yo ke ma qeyûman bişîrawê.”

 

‘Ma do peynîya xespê qeyûman bîyarê’ 

 

Ayfer Turgute ya ke hetê qeyûmî ra kar ra ameybî eştiş ercnayîşê xo de wina vat: “Ma weçînayîş de xeylê bi heyecanin bî. Hedefê ma yê esasî no bî ke ma şaredarîyan qeyûman ra pak bikerê. Ez kar ra ameya eştiş. 5 serrî yo ke ez betal a. Mi şaredarîye de çay viraştêne, sekreterî kerdêne. Tewrê mi 306 kesê bîn kar ra ameyî eştiş. Vera qerarê mehkema ma tepîya game nêerzenê. No caardişêk kêfî bî. Ma nê caardişan qebûl nêkenê. Ma do 1ê Nîsane de peynîya xespê qeyûman bîyarê.”

 

‘Seba mi çîyo ewil aştî yo’ 

 

Dengbêje Meryem Tuncere zî dîyar kerd ke xebatê kulturî bi Keyeyê Dengbêjan reyde rayîr ra berdêne la dimayê qeyûman keyeyê dengbêjan xerepîya, peynîya xebatan ardî û wina qiseykerdişê xo peynî kerd: “Ez hêvî kena ke weçînayîş bibo wesîleya aştî û têduştî. Sey cinîyêke seba mi çîyo esasî pêameyîşê aştîye yo û peynîkerdişê nê şerî yo.”