AMED - Aktîvîsta TJAye Aynur Saricaye Newroza Amedî de qisey kerd û wina vat: "Do eno têkoşîn heta peynî dewam bikero.” 

 

Newroza Amedî bi tewrbîyayîşê se hezaran kesan dewam kena. Aktîvîsta Têgêrayîşê Cinîyê Azade (TJA) Aynur Saricaye pîrozkerdiş de qisey kerd. Aynure bi çepik û tilîlîyan vejîyaye serê sahne û wina vat: “Newroz, xoverdayîş o. Na Newroze do biba wesîleya azadîya fîzîkî ya birêz Abdullah Ocalanî.” 

 

Aynure bale ant serê tecrîdê Îmraliyî û nê çîyan ard ziwan: “Seba şikitişê nê tecrîdî zîndanan de xoverdayîşêke pîl est o. Ma nê xoverdayîşî silam kenê. Sewbîna dayik zî xoverdayîşê Nobeta Edaletî de yî. Ma têkoşînê înan zî silam kenê. Ewro nê raşteyî de serkêşyîa azadîye, cinîyê têkoşer kenê. Ma bi sloganê ‘Jin, jiyan, azadî' ver bi komelêk azad ra dşinê. Do têkoşînê azadîye yê cinîyan heta peynî dewam bikero. Cehd kenê ke têkoşînê ma yê azadîye asteng bikerî. La ma nêtersenê û do eno têkoşîn heta peynî dewam bikero.” 

 

Aynure bale ant serê weçînayîşê 31ê Adare û qiseykerdişê xo wina qedêna: “Ma do qeyûman Kurdistan ra bişirawî. Ma do reyna sîstemê hemserekatîye bîyarî. Jin, jiyan, azadî.”