Marta Somek

 

KAYSERÎ - 7 tepişteyê Zîndanê Cinîyan ê Tîpê Tyî yê Tarsusî mîyanê 5 rojan de bi bahaneyê grevê vêşanîye de yê, ameyî surgunkerdiş. Keyeyê Elîf Kardagî ya tepişte vat: “Ma wazenê tedaya zîndanan kêm biba. Ma wazenê rayaumûmî goş bida vengê têkoşînê embazê ma yê tepişte.” 

 

Zîndanan de roj bi roje polîtîkayê tecrîdî giran beno. Seba azadîya fîzîkî ya Rayberê PKKyî Abdullah Ocalanî û semedê tepişteyê Girava Îmraliyî û tepişteyê sîyasî ke binê tecrîdêk girankerde de yê, 27ê Teşrîna Peyêne ya 2023yî de hetê tepişteyanê sîyasî ra çalakîya grevê vêşanîye yê bêdem û dorveger dîya destpêkerdiş. Ocalano ke 26 serrî yo tepişte yo ra 36 aşmî yo tu xeberêke nîna girewtiş û binpaykerdişê heqan zî zêde benê. Çalakîyan de xîret kenê ke bi zorî awe û werd bidê tepişteyan, xeylê tepişte erzîyenê hucreyanê yew kesî û cezaya dîsîplînî yena dayîş. 

 

Yew nimuneyê tewr peynî yê surgunkerdişê tepişteyan zî Zîndanê Girewte yê Cinîyan ê Tîpê Tyî yê Tarsusî de ame ciwîyayîş. 18ê Adare de roja dişeme 6 tepişteyê cinî Zîndanê Girewte yê Cinîyan ê Tîpê Tyî yê Tarsusî ra bê xebera keyeyê înan û bê xebera înan bi xo, surgunê Erzîncanî ameyî kerdiş û tewr peynî zî tepişteya bi nameyê Elîf Kardage vizêr şewe surgunê zîndanî ameye kerdiş. Elîfa ke bi îdîayê "endamîya rêxistine" ameye tepiştiş û 6 serrî yo tepişte ya û goreyê malumatê ke hetê keyeyê aye ra ameyî, bi şewe surgunê Zîndanê Girewte yê Cinîyan ê Kayserî ameye kerdiş. 

 

Keyeyê Elîfe ajansê ma rê qisey kerd. 

 

Keyeyê aye dîyar kerd ke hetê rayîrberîyê zîndanî ra Elîfe 20ê Adare roja yewşeme ameya surgunkerdiş û dîyar kerd ke vizêr şewe hetê îdareyî ra telefonê înan ameyo kerdiş û telefon de dîyar kerdî ke Elîfe surgunê Zîndanê Girewte yê Cinîyan ê Kayserî ameya kerdiş. 

 

Keyeyê aye ard ziwan ke rewşa Elîfe ke berdî Kayserî baş a û vat: “Ma tewr peynî roja dişeme bi Elîfe reyde bi rayîrê telefonî qisey kerd û Elîfe ma rê vat ke 6 tepişteyê cinî surgun bîyî û bi taybetî tepişteyê grevê vêşanîye yenê surgunkerdiş. 15-20 rojî verê cu ma şîyî pêvînayîşê akerde. Ma ra vat, 'Grevê vêşanîye vera xeylê teda estê’." 

 

Keyeyê Elîfe da zanayîş ke Elîfe semedo ke verê cu tewrê çalakîya grevê vêşanîye bî, kîloyê xo vînî kerd û wina qiseykerdişê xo peynî kerd: “Ma wazenê tedaya zîndanan kêm biba. Ma wazenê rayaumûmî goş bida vengê têkoşînê embazanê ma yê tepişte."