MERKEZÊ XEBERAN - Cinîyê ke 1ê Gulana 1977î de Taksîm de dinyaya xo bedelnayî, bi vîrardişê xo zerrîya cinîyê ke ewro têkoşînê xo dewam kenê de ciwîyenê. Vîrardişê înan ê kilmî sey sembolê têkoşînêk derg vîrê merdiman de yo. 

 

1ê Gulana 1977î de Raşteyê Taksîmî de bi tewrbîyayîşê 500 hezar kesî mîtîng ame viraştiş. La netîceyê hêrişê serê raşteyê mîtîngî ke ame kerdiş de raşte açarîya gola gonî. A roje Jale ra heta Hacere xeylê cinîyê ciwanî dinyaya xo bedelnayî. No qewimîyayîşo ke bi nameyê '1ê Gulana bi gonî' kewt tarîx, vera ke 47 serrî serê ci ra derbaz bibo zî nêameyo vîrîkerdiş. Hîkayeya cinîyê ke a roje dinyaya xo bedelnayî, zerrîya cinîyê têkoşer de ewro ciwîyena. 9 cinîyê têkoşer zî a roje de girê Kazanciyî de ameyî qetilkerdiş. Nika zî merdim û nasê nê cinîyan têkoşînê ganîverdayîşê vîrardişê înan danê. 

 

Sey 1ê Gulana bi gonîn tarîx de ca girewt

 

Roja qetlîyamî de 28 kesî netîceyê gecilnayîşî yanî xeniqîyayîşî de dinyaya xo bedelnayî, 5 kesî bi guleyê ke panzer ra ame eştiş û 1 kes zî semedo ke binê panzerî de mend dinyaya xo bedelna. Zafane kamyonêk ke girê Kazanciyî de ca bîbî vera kewtê dafike û dinyaya xo bedelnayî. A roja sîya ke tarîx de sey '1ê Gulana bi gonîn' ame nuştiş de tena Girê Kazanciyî de 9 cinîyî dinyaya xo bedelnayî. 

 

Nameyê cinîyê ke ameyî qetilkerdiş ê arşîvê DÎSKî de yê 

 

Cinîyê bi nameyê Diran Nergis, Îpek Sarman, Hatîce Altun, Jale Yeşilnil, Kiymet Duman, Leyla Altiparmak, Meral Ozkol, Nazan Unaldi û Sibel Açikaline ke arşîvê DÎSKî de ca gênê ameyî vîrîkerdiş. 

 

Serê nameyê aye anitêk ame viraştiş: Hacer Îpek Sarman 

 

Hacer Îpek Sarmana ke bi porê xo yê honaye û ruhê xo yê xoverdayox ameyêne naskerdiş, bi Kiymet Dumana ke qezaya Bozcada ya Çanakkaleye reyde eynî qederî pare kerd. Wextê wendekarîya Fakulteya Veterînerî bî, eynî wext de aktîvîsta Kovara Rayîrê Şarî (Halkin Yolu) bî. Dimayê serran embazê aye her serre bi zîyaretê vîrdarîya ke seba aye Bozcaada de viraştî aye yad kenê. 

 

Hîkayeya Sîbele vîrê cinîyê têkoşer de ya 

 

Sîbela vera heme astengîyan keye ra vejîya û şî Taksîm. Sîbele wendekara Bolumê Matematîkî ya Unîversîteya Stenbolî bî. A roje sey cinîyêke ciwan ya 18 serrî dinyaya xo bedelnaye. Hîkayeya Sîbele hetê embaz û hemrayanê aye ra sey "cinîyêke xeylê serkewte û şorişgêrêke namdar" yena qalîkerdiş. Sîbele vîrardişê cinîyê têkoşer de cayêke muhîm gêna. 

 

Jale sey 'şoreşgera lîseyî' yena binamekerdiş 

 

Jale Yeşîlnile yew sembola muhîm ya têkoşînê cinîyê lîseyî ya. Jale serra 1960î de dadîya xo ra bena û 17 serrî ya xo de ameye qetilkerdiş. Têkoşînê Jaleye semedo ke nameyê aye lîseyek rê ame ronayîş mîyanê cinîyê lîseyî de dewam kena. 

 

Her serre 1ê Gulane de ruhê cinîyê ke ameyî qetilkerdiş mîyanê cinîyê ke ver bi Raşteyê Taksîmî ra rayîr ra şinê, barîkatan derbaz kenê û raşteyan de xover danê û têkoşînê xo dewam kenê de yo. Qetlîyam sîyaset û komelê Tirkîya de rêça xorîn verda û cinîyê ke ameyî qetilkerdiş ewro zî bi fotografê ê demî û vatişê şahidan paweyê nê çîyê ke neslê neweyî rê nameyê înan bêro vatiş.