Oznûr Deger

 

MÊRDÎN - Seba mîtîngê herêmî yê Êlihî vengdayîşê tewrbîyayîşî ame kerdiş. Platformê Cinîyan ê Şahmaranî ra Gulnîgar Laçîn Karataşe dîyar kerd ke do bi sloganê "Jin jiyan azadî" Êlih de bê. 

 

Karker, kedkar, cinî û ciwan xo amade kenê ke 1ê Gulane de vera krîzê zafhetin yê welatî, xorîbîyayîşê krîza ekonomîye, kiştişê cinîyan, destdergê, polîtîkayê şerê taybet, talanî raşteyan de bê. Wexto ke karkerê bajarê Kurdistanî xo seba mîtîngê herêmî yê 1ê Gulane ke do siba Êlih de bêro viraştiş, amadekarîyê xo kenê, xeylê bajaran de venga tewrbîyayîşê mîtîngî ame kerdiş. 

 

Mêrdîn ra zî cinîyan venga tewrbîyayîşê mîtîngî şarî rê kerd. 

 

Platformê Cinîyan ê Şahmaranî ra Gulnîgar Laçîn Karataşe destpêkerdişê qiseykerdişê xo de bale ant serê muhîmîya 1ê Gulane û vat: "Ganî her kes raşteyê mîtîngî de bireso pê. Seba dîyîşê keda cinîye ganî ma tîya de bê. Sey platformî ma do Êlih de bê û ma venga tewrbîyayîşî heme cinîyan rê kenê." 

 

Gulnîgare da zanayîş ke dimayê betalkerdişê Pêkerdişê Stenbolî şîdetê hemverê cinîye hîna zêde bî û hûmara qetilkerdişê cinîyan zêde bî. Vera qetilkerdişê cinîyan de ma do bi felsefeya 'Jin jiyan azadî' raşeteyan de bê." 

 

Hemsereka Tum Bel-Senî ya Mêrdînî Gulbîn Onere zî dîyar kerd ke 1ê Gulane seba karker û kedkaran roja paştdayîşî ya û wina qiseykerdişê xo dewam kerd: "Ma do raşteyan de hêvîya xo ya azadî, demokrasî, edalet û aştîye biqîrê. Ma do vera xebatê bêasayîş, vera kedwerîye raşteyan de bê. Vera taciz, şîdet û destdergîye de raşteyan de bê. Ma venga her kesî kenê ke tewrê mîtîngo ke do Êlih de bêro viraştiş bibê.”