Pelşîn Çetînkaya- Gulîstan Gulmuş

 

AMED - Şar dimayê weçînayîşê herêmî yê 31ê Adare, pawitişê xo yê şaredarîyê Amedî ke zafane DEM Partî girewte têdima hûmart û waşt ke texrîbatê qeyûman raşte ra bêrê wedaritiş. 

 

Weçînayîşê herêmî yê 31ê Adare de Partîya Têduşte û Demokrasîyî yê Şaran ( DEM Partî) Kurdistan de nizdîyê 80 şaredarî girewt. Yew nê bajaran ra zî Amed o. Amed de se ra 64.09ê rayan ame girewtiş. Dimayê weçînayîşan şar şaredarîyê DEM Partîye ra waştişanê xo ard ziwan. 

 

Ebru Koçe da zanayîş ke cayo ke ciwîyenê de problemê pîl est ê û wina avat: “Cayo ke ma ciwîyenê de problemê pakî û neqlkerdişî est o. Ma wazenê parkê ma hîna zêde bê. Awanîyê bi xesarin zêde yê. Ganî heme bêrê rijnayîş. Ganî awanîyê ke yenê viraştiş zî vera erdlerzî de xurt bê. Ganî seba cinîyan raşte bêrê akerdiş. Ganî fuar bêrê akerdiş. Ganî qursê huner û sporî seba cinîyan bêrê akerdiş. Bazarê cinîyan bêrê akerdiş. Ganî hîna zêde fabrîqa bêrê akerdiş. Şuxilnayîşê tîryakî zaf zêde bîyo. Ganî rewşa ciwanan bêra başkerdiş û dormeyê baş seba ciwanan bibê.”

 

‘Wa raşteyan asayîş bikerê’ 

 

Zehra Kantarciogluye zî da zanayîş ke cayo ke tede ciwîyena de şuxilnayîşê tîryakî bîyo zêde û ê destur nêdanê tutanê xo ke bivejê teber û vat: “Ganî şaredarî seba cinîyan hîna zêde bixebeta. Ganî seba cinîyan dezgeh bêrê akerdiş. Wa cinî xurt biba. Ganî tedbîrê xo bigêra. Ganî asanî biveja raşte. Ganî wesayîtê mîyanê bajarî bêrê zêdekerdiş. Ganî kontrol û asayîşê bajarî zêde bibo.”

 

‘Wa otobus zî ercan bibê’ 

 

Şuşer Savure zî dîyar kerd ke ganî şaredarî bazarêk ercan ke her kes eşkeno tede herînayîş bikero viraza û pakîya dorme de baldarî têbigêra. Şuşere wina ard ziwan: “Her ca de eşte est o. Her ca lêşin o. Ganî bêrê pakkerdiş. Taxî zaf lêşin ê. Nê semedî ra mere kewenê keyeyê ma. Rewşa ma xirab a. Her çî bîyo vay. Wa tay ercanî bibo.” 

 

Waştişê qursê kurdî 

 

Emîne Bîngole zî wina vat: “Ganî seba tutanê kurdan qursê kurdî bêrê akerdiş. Her çî bîyo vay. Îmkan tu kesêk de çin o. Ganî şaredarî seba şarî xîret bikera. Tîya ra pê do qezenc bikerê. Ganî seba cinîyan dezgeh û cayê karî bêrê akerdiş. Ganî îmkanê winasî bêrê awankerdiş. Betalî ra ciwanî keyeyê xo de nêvindenê. Şinê teberê welat. Wa mektebê kurdî, komeleyî bêrê akerdiş. Wa tutê ma ziwanê xo bimusê.”

 

‘Ganî seba cinîyan raşte bêrê akerdiş’ 

 

Emîre El-Muslîme zî eşkera kerd ke şewe raşteyê Amedî asayî nîyê û wina pawitişê xo yê şaredarîye ra hûmarte: “Ganî şaredarî her ca pakî bikera. Semedo ke asayîş bajar de çin o, bi şewe kes nêeftereno bivejo teber. Ma na babete de asayîş wazenê. Her çî bîyo vay. Ma wazenê tay ercanî bibo. Ganî raşteyê îstîhdamî seba cinîyan bibo. Ganî heme raşteyan de xebatê seba cinîyan bibê.”