Rozerîn Gultekîn

 

STENBOL – Seba tepişteya nêweşe Hatîce Yildize muracatê serbest veradayîşê bi kontrolî hetê îdareyê zîndanî ra bi bahaneyê ‘şertê ferzî awan nêbîyê’ ame redkerdiş. 

 

Merdime tepişteyan ke bi bahaneyê pere tepişteyan rê şirawenê yenê muhakemekerdiş û bi nê çîyî xîret yeno kerdiş ke ters bêro awankerdiş. La polîtîka netîce nêgirewt û paştîdayîşê bi tepişteyan reyde roj bir roje pîl beno. yew a merdime tepişteyan ke bi destê hukmî hêriş hemverê aye de pê ame Hatîce Yildize ya. Hatîce Yildiza 75 serrî bi bahaneyê kênaya xo û embazê aye rê pere şirawita bi îdiayê ‘rêxistine rê fînansmanî pê arda’ dewa ameye akerdiş û 4 serrî û di aşme ceza ci rê ameye birnayîş. Dimayê nê çîyî Hatîce 23yê Adare de ameye tepiştiş û şirawîya zîndanê cinîyan ê Bakirkoyî. Qerarê mehkemaya herêmî hetê mehkemaya îstînafî ra ame tesdîqkerdiş. 

 

Hatîceya ke nêweşa tansîyonê berz, çim, fitqê paştî û xeylê nêweşîyê aye yê bîn est ê, wexto ke polîs kewtê keyeyê aye serê hişê xo ra şîya û bi sedyeyi zereyê keyeyî ra ameybî vetiş. Avûkatê Hatîceye seba serbest veradayîşê bi kontrol û taloqkerdişê înfazî muracatê Zîndanê Cinîyan ê Bakirkoyî dabî. Eynî wextî de serê nameyê Hatîceye muracatê şexsî Mehkemaya Desturê Bingehîn (DDB) rê ameybî kerdiş. Avûkatê Hatîceye Xebat Demîrcanî derheqê rewşa peynî de û muracatê zîndanî de malumat da. 

 

Muracat ame redkerdiş 

 

Xebatî da zanayîş ke muracato ke seba serbestverdayîşê bi kontrolî kerdî, hetê îdareyê zîndanî ra bi bahaneyê ‘şertê ferz awan nêbîyê’ ame redkerdiş la qerar teblîxê înan hema nêkerdo. Xebatî wina vat: “Derheqê waştişê taloqkerdişê înfazî de zî caardişê nêweşxaneyê dewlete ver bi peynî de yo û dima ra aye sewqê Dezgehê Tibê Edlî (ATK) kerdê. Ma do derheqê qerarî de îtîrazê xo mehkemaya înfazê Bakirkoyî de zî bikerê.”

 

 ‘Ma taqîbkerdoxê prosesî yê’ 

 

Xebatî qiseykerdişê xo yê peyênan de wina vat: “Xîret kenê ke vernîya paştîdayîşê bi tepişteyan reyde bêro girewtiş. Ma tecrîdê giran yê zîndanan vînenê. Heta ke tepişteyan mehkumê mergî kenê wazenê zîndanan de bidê vindarnayîş. Coka ra qerar ame dayîş û no qerar ne huqûqî û ne zî wijdanî yo. Ma do taqîbkerdoxê prosesî bibê. 

 

Rojanê verênan de problemê çiman vera Hatîceye sewqê Nêweşxaneyê Perwerde û Cigêrayîşî ya Dr. Sadî Konukî ameye kerdiş la her çend ke ame vatiş ke ganî bi lezkî amelîyat biba zî bi rojan o serbest nêameya veradayîş.