ÎZMÎR - Îzmîr de kedkarî meydanê yewê Gulane de resayî yewbînan û polîtîkayê şerî û kedwerdişî şermezar kerdî. Kedkaran vatî, "Serkewtiş do ê xoverdayoxan bibo.”

 

Pîrozbayîya Îzmîrî hetê Komîteyê Amadekarî yê 1ê Gulane ra ame birêxistinkerde û Meydanê Gundogdûyî de ame organîzekerdiş. Temsîlkarê partîyê sîyasî, sendîka, rêxistinê komelî û rêxistinê meslegî serê sibayî raşteyê Basmane, Lîman, Kuçeyê Kibris Şehîtlerî û Raşteyê Cûmhûriyetî de kom bîyî û 4 baskan ra ver bi raşteyî rayîr ra şîyî.

 

Rayîrşîyayîşî de pankartê bi nuşteyê "Seba karêk însanî û cuyêka însanî biciwîyo 1ê Gulane", "8ê Adarê heta 1ê Gulane ma bi raperînê cinî yenê. Biciwîyo 1ê Gulane", "Seba kede, edalete û azadî ma raşteyê 1ê Gulane de yê" ameyî berzkerdiş û dowîzê "Jin, Jiyan, Azadî", "Şer û tecrîdî rê nê", "Qerardarîyê serê sosyalîzmî qerardarîyê serê însanî yo" û "Peynîya feqîrîya cinîyan bîyarê" ameyî wedaritiş.

 

Çalakîya ke bi hezaran kesî tewrê bîyî, govende ameye gernayîş. Dimayê ke baskê rayîr şîyayîşî resayî raşte, mîtîng de dest pêkerd. Parlamenterê CHP, DEM Partî, Şaredarê Bajarê Girdî yê Îzmîrî Cemîl Tûgay û şaredarê qeza tewrê mîtîngî bîyî.

 

Qiseykerdoxan dîyar kerdî ke seba dewletêke demokratîke, laîk, komelî û huqûqî do seba têduştî û edaletî û demokrasî bi israr û bi qerar têkoşîn bikerê.

 

Mîtîng dimayê qiseykerdişan bi konserê Mogolarî peynî bî.