RIHA - Namzeta DEM Partî ya hemşaredarîya Curnê Reşî Garîp Yeşîla ke do 2yê Hezîrane de reyna şêrê weçînayîşan qisey kerd û vat: “45 serrî verê cû vera feodalîzmî, îradeyê şaredarîye yê serkêşîya cinîyan ameybî girewtiş ma do sey mîras xo rê bigêrê.” 

 

Partîya Têduştîye û Demokrasîyî yê Şaran (DEM Partî) dimayê 45 serrî qezaya Curnê Reşî ya Rihaye de ser kewt. La bi îtîrazê AKPyî, bi qerarê YSKyî do 2yê hezîrane de reyna uca de weçînayîş bêro kerdiş. Şewa weçînayîşî mîyanê ci de namzetê AKPyî Alî Aslan Bayikî zî tede koma 50 kesî ya AKPyî Merkezê Ciwanan û dormeyê ci da verê adirî. Dima ra şar herikîya raşteyan û wayîrê îradeyê xo vejîya. Şar do newe ra 2yê Hezîrane de şêro serê sindoqan û qerarê xo bido. Namzeta DEM Partîye ya hemşaredarîya Curnê Reşî Garîp Yeşîle derheqê projeyê xo û çîyê ke ameyî ciwîyayîş de qisey kerd. 

 

‘Ma do hewrê sîyayî serê cinîyan ra wedarnê’ 

 

Garîpe da zanayîş ke 2014î ra nata xebatê partîye rayîr ra bena û çimdarîyê xo yê weçînayîşî yê cinîyan pare kerd. Garîpe wina vat: “Ma xebatê xo bi şar, cinî û ciwanan reyde rayîr ra berd. Nê prosesî de çi heyf o ke nuqtaya cinîyan de tepîyamendişêk est bî û camêrdî gamêke apey de bî. Coka ra zî nizdîbîyayîşê feodalî yê hemverê cinîyan mojneno. Cinî mîyanê çar dêsan de yê û nêeşkenê xo îfade bikerê, nêeşkenê bibê wayîrê vatişî. Ma wazenê cinî mîyanê çar dêsan ra biveja û biba wayîrê vatişî. Ma wazenê hewrê sîyayî serê cinîyan ra wedarnê.” 

 

‘Ma taqîbkerdoxê mîrasî yê’ 

 

Garîpe dewamê qiseykerdişê xo de dîyar kerd ke vera heme teda û zordarîyan bi xoverdayîşê xo mîrasê cinîyê ke kewtê aver dewam bikerê û vat: “78î de ke o wext feodalîzm vejîyabî sewîyeya tewr cor de ma bi serkêşîya hîrê embazê cinî şaredarî girewtbî. Ma ewro nê mîrasî hezaran reyde anê têkişt. Bi hezaran embazê ma yê ke xebetîyenê est ê. Qerarê xo eşkenê bigîrê û eşkenê qisey bikerê. Xîretkerdişê ma zî no yo ke ma wayîrê nê mîrasî bivejê. Curnê Reş tarîxê partîye de wayîrê cayêk muhîm o. Dimayê 45 serrî şar verê xo da ma. Şar bi serran ame binpaykerdiş. Tu xizmetêk nêame kerdiş. Bi taybetî zî hetê cinîyan ra. Şar êdî zano ke xelasbîyayîş û çareserî bi DEM Partîye de yo. Şar do êdî koçê metropolan nêkero û do sey karkerê demkî nêşêrê cayanê bînan.”

 

 ‘Ma wazenê bikerê qezayêke nimune’ 

 

Garîpe qiseykerdişê xo yê peyênan de ard ziwan ke ê wazenê bibê qezayêke nimune û wina peynî kerd: “Wexto ke ma ser bikewê ma do projeyanê xo bikerê dewre. Ma do seba cinîyan îmkanê kar, koperatîfan, qursan, bazarê cinîyan awan bikerê. Do cinî îdareyê xo bi xo bikerê. Ma do goreyê lazimîyanê şarî xebatan rayîr ra berê. Ma do taxe bi taxe bi şarê xo reyde ronişê û xebatê xo bikerê. Seba kal û pîr, ciwanê ma projeyê ma est ê. Wexto ke ma şaredarî girewt ma do heme projeyan bikerê dewre. Ma wazenê Curnê Reş bikerê qezayêke nimune. Ma venga heme şarê xo kenê ke a roje de şêrê serê sindoqan û wayîrê îradeyê xo bivejê.”