AMED - Keyaya taxa Koperatîfan ya girêdayeyê qezaya Yenîşehîrî, Fatima Kantare dîyar kerd ke seba çareserkerdişê problemê taxe û bi taybetî zî problemê cinîyan bîya keya. 

 

Weçînayîşê herêmî yê 31ê Adare de babeta temsîlkarîya cinîye de xeylê partîyî tepîya kewtê û kewtîyayîş de zî hûmara cinîyan zêde bî. Serra verêne hûmara keyeyê cinîyî hezar û 134 bî û emser zî vejîya 2 hezar û 150î. Mîyanê 50 hezarî ra zêde keyayan de reyna hûmara cinîyan nêresa sewîyeya cor. Qezaya Yenîşehîrî ya Amedî de Fatima Kantare sey keyaya taxa Koperatîfan ameye weçînayîş. 

 

25 serrî bî 5 demî de pêser kesêk keyatîya taxe keno. Fatimaye weçînayîş de hemverê 4 namzetê camêrdî de bî namzet û 8 azadîyê cinîye reyde kewta weçînayîş. Fatima 8 hezar û 601 rayî ra 3 hezar û 861 rayî girewte û ameye weçînayîş.

 

 ‘Mi bi 8 azadîyê cinîye qerar da’ 

 

Fatimaye qezaya Mîdyadî ya Mêrdînî de yena dinya. 20 serrî verê cû zewecîyena û bar kenê Amed. Di tutê aye est ê. Fatimaye dîyar kerd ke çimdarêke baş a û kêmasîyê taxe dîya, nê semedî ra qerar daya û bi 8 azadîyê cinîye reyde kewta weçînayîş. Fatimaye wina dewam kerd: “Mi waşt ke problemê cinîyan reyde eleqedar biba û wextê xo înan reyde derbaz bikera. Cinî bi asanî nêeşkenê derdê xo ra vajê. La eşkenê cinîyêk rê bi asanî vajê. Ez na babete de bi şans a. Wext yeno ez bena embaze, wext yeno ez bena waye, wext yeno ez bena dayîka tutê kênaye.” 

 

‘Mi yew bi yew da berê cinîyan ro’ 

 

Fatimaye wina ercnayîş kerd: “Wexto ke ez bîya namzet her kes vat camêrd, cinî ferq nêkeno û paştî dayê mi. Mi vat ez seba çareserîya problemanê taxe û cinîyan tîya de ya. Ez seba cinîyê ke paştî dayê mi tîya de ya. Dima ke bîya namzet mi yew bi yew da berê înan ro. Reaksîyonê înan ê zaf weş est bî. Têkilîya mi bi cinîyan reyde xeylê xurt a. Seba ke na têkilî hîna xurt biba ez wazena kiratxaneyêk şenik akera û kişta ci de raşteyê sporî akera. Wazena seba tutan parkan newî bikera û raşteyê kayî hîra bikera. Mi heywanê raşteyî zî vîra nêkerd. Seba înan zî ez do kulubeyan akera û paştîdayîşê mamayî hîra bikera.” 

 

‘Bawerîya cinîyan hêz da mi’ 

 

Fatimaye wina peynî kerd: “Ma sey cinî her tim xo danê asîyayîş. Keye de roniştiş, ewnîyayîşê tutan, pakkerdiş tena kare cinîyan nîyo. Ganî ma teber de serê payanê xo de vinderê. Ez paştîdayîş dana cinîyan. Ez wazena heme cinî cayê weşan de ca bigîrê. Mi zî cinîya xebatkare ra hêz girewt. Vatê ti cinîyêke xurt a, eşkena nê karî bikera. Bawerîya cinîyan hêz da mi.”