Nazlican Nûjîn Yildiz

 

ÎZMÎR – Cinîyê ke seba pîrozkerdişê 1ê Gulane Raşteyê Gundogduyî yê Îzmîrî de kombîyî dîyar kerdî ke tewr zêde cinî bêtêduştîye ra tesîr bena û vatî: "Cinî do her tim raşteyan de xover bidî û seba azadîye têkoşîn bikerê." 

 

Pîrozkerdişê Îzmîrî hetê Komîteya Amadekare ya 1ê Gulane ra ame birêxistinkerdiş û Raşteyê Gundogduyî de vizêr pê ame. Cinîyê ke tewrê pîrozkerdişî bîyî bi slogan û pankartê xo waştişê xo ardî ziwan. 

 

Cinîyê ke raşteyê pîrozkerdişî de amade bî ajansê ma JINNEWSî rê qisey kerdî û venga berzkerdişê têkoşînî kerdî.

 

 'Ma do vengê xo bidê eşnawitiş’ 

 

Nîmet Bolcale dîyar kerd ke Tirkîya de cinî yenê qetilkerdiş û keda înan yena binpaykerdiş û vat: "Wexto ke vanê 1ê Gulane Roşanê Karkeran yeno vîrê merdimî. Seba girewtişê heqan na roje ameye pêşwazîkerdiş. Cinî û karkerî roja 1ê Gulane de waştişê xo anê ziwan. Ma cinî zî na roje de raşteyan de cayê xo gênê. Ma qalê rewşa xo ya ekonomîye kenê, ma qalê mergê karkeran kenê. Coka ra zî ma cinîyan rê sloganê 'Jin jiyan azadî' muhîm o. Cinî hetê ekonomîye de probleman ciwîyenê û her roje yenê qetilkerdiş. Seba çareserîye zî ma cinî herikîyenê raşteyan. Ma wazenê vengê xo bidê eşnawitiş.” 

 

Bêtêduştîya mîyanê komelî 

 

Sebahat Kuşe zî qiseykerdişê xo de bale ant bêtûduştîya mîyanê komelî û vat: “Mîyanê komelî de tewr zêde cinî raştê bêtêduştîye yena. Cinî bixebîtîyo zî nêxebitîyo zî îdareyê keyeyî ra berpirsîyar a. Cinî nêrêxistinbîyayîşî vera raşteyan de zêde nîna dîyîş. Nê welatî de cinî û tutî yenê qetilkerdiş û çi heyf o ke na rewşe nizdîbîyayîşê ma vera pê yeno. Vera her çîyî 'Biciwîyo 1ê Gulane'." 

 

'Cinî bi tedaye reyde yena rî bi rî’ 

 

Hayalnur Taşdage zî da zanayîş ke sîstemê bîyaye sîstemê kedwerîye yo û wina dewam kerd: “Ferz kenê ke cinî binê tesîrê ekonomîya camêrdî de biba. Cinî goreyê camêrdî heqdestêk kêm gêna û her çend eynî karî bikera zî. Ma qet cinîyan wezîfeyê tewr cor de nêvînenê. Cinî hîna zêde tedaye reyde rî bi rî manena. Xora tacîz, şîdet û destdergî zêde yo hemverê cinîyan de. La têkoşînê ma do seba cinî, tut û karkeran dewam bikero.”

 

 'Ganî hukmat bibedelîyo’ 

 

Sevgî Goke qiseykerdişê xo de qala rewşa cinîyê teqewîte kerd û vat: "Îqtîdar 16 mîlyon hemwelatijê ke teqawîtbîyî mehkumê mergî kerd. Walîyê ke hetê hukmatî ra ameyî tayînkerdiş xîret kenê ke mîtîngê 1ê Gulane asteng bikerê. La ganî bêro zanayîş ke 3-4 serrê peyênan de ma feqîrîyêke tewr cor ciwîyenê. Ez 62 serrî ya, heta nika mi qet meaşê asgarî nêgirewt. Goreyê mi ganî hukmat bibedelîyo."