Pelşîn Çetînkaya

 

AMED - Aktîvîsta TJAye Xecê Şene derheqê kampanyaya TJAye ya bi sloganê ‘Bi jin jiyan azadîye reyde ver bi azadîye ra’ dîya destpêkerdiş û 8ê Adare de peynî bî de qisey kerd û vat ke kampanya de tewr zêde felsefeya ‘Jin jiyan azadî’ û waştişê ‘azadîye’ vejîya aver û do têkoşîn dewam bikero. 

 

Her cayê dinya de şîdetê serê cinîyan roj bir roje giran beno û rêxistin û têkoşînê cinîyan zî vera nê de pîl beno. Têgêrayîşê Cinîyanê Azade (TJA) na çarçewa de xebatê xo rayîr ra bena. TJAye tewr peynî bi sloganê “Bi jin jiyan azadîye reyde ver bi azadîye’ 15ê êlula 2023yî de Riha de kampanyaya xo deklere kerd. Rojeva TJAye de çalakî, bername û atolye ca girewtî. Kampanya 8ê Adare de peynî bî û raporê netîceyê kampanyaye 14ê Nîsane de qezaya Nisêbînî ya Mêrdînî de ame eşkerakerdiş. 

 

Aktîvîsta TJAye Xecê Şene derheqê kampanya û prosesî de qisey kerd.

 

‘Amancê kampanyaye şikitişê tecrîdî bî’ 

 

Xecê bale ant serê kampanyaya ke Riha de deklere kerdbî û vat: “Amancê kampanyaye azadîya fîzîkî ya Abdullah Ocalan û şikitişê tecrîdê serê ci bî. Abdullah Ocalan 25 serrî yo Îmraliyî de yeno tepiştiş. Pêvînayîşê keye û avûkatan nîno kerdiş. Wextê azadîya fîzîkî ya Abdullah Ocalanî ameyo. Ma serê na nuqta de xebate rayîr ra berd. Ma her cayê Kurdistanî de atolye pê ard. Sernameyê ma tecrîd û têkoşînê vera polîtîkayê şerî bî. Ma vat ma senî eşkenê vera nê polîtîkayan de têkoşîn bikerê. Ma vat ma senî eşkenê zîhnîyetê serdet ê camêrdî bibedelnê. Ma na nuqta ser de bi camêrdan reyde munaqaşayê hîra kerd. Kombîyayîşê xoser ê cinîyan û atolyeyê ma pê ameyî. Nê cayan de xebatê berzkerdişê fehm, rizgarîya cinî, îdeolojîya rizgarî, raybaz, welatparêzî, têkoşîn, etîk-estetîk, camêrd, bedilnayîşê camêrd, teorîya qutbîyayîşî ameyê munaqaşakerdiş. Serkewtişêk pîl zî ame destfînayîş.” 

 

Wayîrvejîyayîşêk cidî est bî 

 

Xecêye dewamê qiseykerdişê xo de bale ant serê xebatê hempar ke bi cinîyê Tirkîya û Rojhelatê Mîyanênî reyde rayîr ra benê û vat: “Ma bi Cinî Pîya Xurtê û platformê bîn ê cinîyan reyde bi serran o xebate rayîr ra benê. Ma 8ê Adare û 25ê Teşrina Peyêne zî wina rêxistin kenê. Ma pîya munaqaşa kenê û xeta xo ya çalakîye awan kenê. Hetê kampanyaya ma de zî no wina bî. Ma xeylê cayan de pîya xebatî rayîr ra berd. Xeylê aktîvîstê TJAye nê prosesî de ameyî destbendkerdiş. Komê cinîyan ên femînîst, têgêrayîşê cinîyan û platformê cinîyan bi hawayêkê cidî wayîrê ci vejîyayî.”

 

‘Ma fînal de rapor amade kerd’ 

 

Xecêye qala fînalê kampanyaye zî kerd û wina vat: “Ma raporêke amade kerd. Ma xebatanê xo peşkeş kerd. Têkoşînê vera polîtîkayê şer, qirkerdişê cinî, xoza, tecrîd û her tewirê şîdetê serê cinîye, rayîr ra şîyayîşê azadîye ra heta xebatê bîn heme xebatê bîn ê temamê çalakîyan çarçeweya kampanyaye de aver kewtî. Zîndanan de grevê vêşanîye est bî. Ma komxebat kerd. Ma Amed, Stenbol, Îzmîr û xeylê bajarê bînan de komxebat kerd. Ma panel viraşt. " 

 

Problemê ke cinî ciwîyenê 

 

Xecêye dîyar kerd ke wextê xebatan de problemê ke tewr zêde vejîyayê raşte tespît kerdê û wina dewam kerd: “Tena problemê cinîyan çin o. Xeylê problemî est ê. Ê tewr muhîm zî şîdet o. Keye de, raşteyan de, her raşteyê cuye de hemverê cinîyan de her tewir şîdet est o. Şîdetê psîkolojîk, komelkî, ekonomîk. Polîtîkayê teda û binpaykerdişî vera cinîyan de est o. Tabîî no zî tecrîd û polîtîkayê şerê taybetî ra cîya nîyo. Krîzê ekonomî her ke şino giran beno. No beno sebebê kaosî. Krîz serê cinîyan de tesîr virazeno. Ancî babeta muhîm mergê şikin ê cinîyan a. Sebebê mergê şikin nîno cigêrayîşkerdiş. Esasê xo de sebebê ci est o. Polîtîkayê şerê taybetî ke bi destê dewlete aver keweno yo. Reyna problemê qirkerdişê kulturî est o. Psîkolojîyê xerîbkerdişê vera ziwan û kulturî roj bi roje zêde beno. Çarçeweya kampanyaya xo de ma nê babetan ser de vindertî û ma xebata fehmî rayîr ra berd.” 

 

‘Netîcenameyê kampanyaye Mêrdîn de ame eşkerakerdiş’ 

 

Xecêye qiseykerdişê xo yê peyênan de wina ercnayîş kerd: “Çîyo ke zêde bale ant çekuya “azadîye ya jin jiyan azadî’ bî. Ma felsefeya ‘jin jiyan azadî’ hem kampanya xo de û hem zî 8ê Adare û Newroze de û sewbîna xebatê weçînayîşî de esas girewt û ma cewabêk da zîhnîyetê serdest ê camêrdî. Çîyo ke ser kewt felsefeya ‘jin jiyan azadî’ û cinî bî. Ma bi fînalê Nisêbînî dem birna la têkoşîn nêqedîya. Amancê ma azadîya cinîyan û Birêz Ocalanî yo. Azadîya Birêz Ocalanî eynî wextî de azadîya kurdan û cinîyê Rojhelatê Mîyanênî yo. Do têkoşînê ma bi ‘jin jiyan azadî’ dewam bikero. "