Şehrîban Aslan

 

AMED - Rozerîn Yildiza ke di serrî nêweşxane de têkoşînê cuye da rojanê verênan de dinyaya xo bedelnaye. Avûkata Rozerîne, Dîcle Sumere dîyar kerd ke çîyê ke yenê ciwîyayîş polîtîkayê şerê taybetî ra xoser nîyê. 

 

Qezaya Hênê ya Amedî de cinîya bi nameyê Rozerîn Yildize hetê Ozcan Yildizî ke aye reyde merheleya fekvedayîşî de bî bi hawayêkê sîstematîk raştê teda ameye û di reyan stargeh de mende. Rozerîna ke tehîdan vera mecbur mende agêra keyeyê xo reyna raştê şîdetê sîstematîk ameye. Şikdar Ozcan Yildiz 8ê Hezîrana 2022yî de bi tifingî Rozerîne bi giranî birîndar kerd. Rozerîne wedarîyaye nêweşxane û şikdar Ozcan Yildiz zî di roje dimayê qewimîyayîşî ame tepiştiş. 

 

Rozerîna ke 2 serrî têkoşînê cuye da 19ê Nîsane de dinyaya xo bedelnaye. Avûkata Rozerîne Dîcle Sumere proseso ke ame ciwîyayîş ercnaye. 

 

‘Seba cezaya girane bigêro çi destê ma ra bêro ma do bikerê’ 

 

Dîcleye da zanayîş ke Kurdistan de serranê peyênan de şîdetê leşker û polîsan zêde bîyo û no parçeyê polîtîkayê şerê taybetî yo. Dîcleye wina vat: “Çîyo ke Rozerîne cuyaye zî parçeyêk nê polîtîkayî yo. Aye 24 aşmî têkoşînê cuye da la çi heyfo ke têkoşînê cuye vînî kerd. Nika yewine çîyo ke zerrîya ma asan bikero tepiştişê şikdarî yo. La seba cezaya ke heq keno bigêro çi destê ma ra bêro ma do bikerê.”

 

‘Îdianame bi xof bî’ 

 

Dîcleye da zanayîş ke ewil serê dosyayê Rozerîne de qerarê nimite est bî û wina dewam kerd: “Dosya de malumatê kêmî est bî. Îdianame sucê ‘teşebusê qestî kiştiş’î de ame amadekerdiş. Îdianameyo ke ame amadekerdiş bi xof bî. Dozger derheqê şikdarî de waştişê ‘fînayîşê tahrîkê nêheq’ kerd. Îfadeyê şikdarî seke Rozerîne xo kişta bî. Roniştişê yewine aşma Kanûne de bî. Xeylê dezgehê cinîyan waştî tewrê roniştişî bibî la dadgeh red kerd. semedo ke şikê meşru şikdarî est bî hema tepişte yo. Seke mi vat polîtîkayê şerê taybetî vera ceza bêra fînayîş do seba edaletî qet baş nêbo.” 

 

Veng kerd 

 

Dîcleye bale ant serê roniştişê demê verênan û wina vat: “Tewrbîyayîş mird bî. Mehkema waştişê tewrbîyayîşî yê dezgehê cinîyan red kerd û no qerar bi amancê vernîgirewtişê têkoşînê rêxistinkerde ame dayîş. Dezgehê cinîyan wazenê tewr bibê la raşte raşt ame redkerdiş. Merkezê Heqê Cinîyan ê Baroyê Amedî, Komeleya Cinîyan a Rosa waştî tewr bibî. La redkerdê. Kiştişê cinîyan girêdayeyê polîtîkayê şerê taybetî yo. Ganî ma hişmendîya nê çîyî de bê û hem hetkarî bidê keye û hem zî ma.”

 

‘Ceza do vernîya şîdetî bigêra’ 

 

Dîcleye qiseykerdişê xo yê peyênan de vat: “Qerar û yetkîyê şuxilnayîşê tifingî dîyeno şexsan. No polîtîkayê şerê taybetî yo. Roniştiş de şikdar her tim qala nasnameyê kurdî yê Rozerîne kerdêne. Seke o qet kurd nîyo. Rozerîne kurdbîyayîş û nasnameyê cinîye vera bi bêtêduştîye ameye rî bi rî. Leşker û polîs zî nê çîyî tim kenê. Zanê ke netîceyê nê çîyî de ceza nêgînê. Rozerîne bi çekêke ke bi destê dewlete ameya dayîş ameye qetilkerdiş. Seba ke vernîya nê çîyî bêro girewtiş ganî cezayê giran bêrê dayîş.”