Melek Avci

 

ANQARA - Emîne Şenyaşare bi aşman o verê berê girewte yê wezîrîye ke serê ci de ‘edalet’ nuseno de vindena. Heme berê edaletî Emîneye rê girewte yê û no zî mird nêkeno, dewa aye rê ameye akerdiş. 

 

14ê hezîrana 2018î de merdim û pawitoxê Parlamenterê AKPyî Îbrahîm Halîl Yildizî hêrişê serê cayê kare Keyeyê Şenyaşaran kerdî û nê hêrişî de 5 ferdê keyeyî birîndar kerdbî û kesê birîndar wedarîyabî Nêweşxaneyê Pirsûsî. La hêrişê nêweşxaneyî dewam kerd û Merdimê Îbrahîm Halîl Yildizî yê AKPyî tîya de di lajê Emîne Şenyaşare Celal û Adilî yê bi giranî birîndar bîyî, kiştibî. Mêrdeyê Emîneye Hecî Esvet Şenyaşarî zî gama ke seba aqûbetê tutanê xo bimuso şîbî nêweşxane, verê çimanê ci de kiştbî. 

 

Serdozgerîya Komare ya Rihaye derheqê qewimîyayîşî de tehqîqat dabî destpêkerdiş û tehqîqat 18 aşman de temam kerdbî. La dozgerîye îdianame tena derheqê qewimîyayîşo ke cayê karî de qewimîyabî de amade kerd û qewimîyayîşê nêweşxaneyî nêdîbî. Dosyayê derheqê karî de Fadil Şenyaşar ameybî muhakemekerdiş û 37 serrî û 9 aşmî ceza ci rê ameybî birnayîş û nika hucreyê yew kesî de yeno tepiştiş. Qewimîyayîşo ke 3 kesî ameyî qetilkerdiş de 18ê Êlula 2019î de zî tena Enver Yildiz ê birayê wekîlê AKPyî bi 18 serrî cezaya zîndanî ameybî cezakerdiş. 

 

Nê semedî ra Emîne Şenyaşar û lajê aye Ferît Şenyaşarî ke bi birîndarî qewimîyayîş ra xelisîyabî, seba Fadil Şenyaşarî yo ke bi birîndarî ameybî tepiştiş û nizdîyê 4 serrî bi tena sereyê xo hucre de yê û betalkerdişê qerarê "nimite" yê serê dosyeye, derheqê qetlîyamê nêweşxaneyî de 9ê Adara 2021î de verê Edlîyeya Rihaye de dest bi çalakîya "Nobeda Edaletî" kerdbî. Selahîyetdaran nêwaştî ke çalakîya aye bivînê. 

 

Kesê ke qetlîyam pê ardî teber de yê û yê birîndarî tepişte yê 

 

Emîne Şenyaşare a roje ra heta nika pey edaletî de ya. Lajê aye ame tepiştiş û 23 kesê ke keyeyê aye parçekerdî seke tu çîyêk nêkerdî gêrenê. Emîneya ke hîrê serrî yo têkoşînê edaletî rayîr ra bena ber bi ber gêrena û edalet wazena. 

 

Nobeta ewil Riha de bî 

 

Emîneye bi lajê xo Ferîtî reyde 8ê Adare de verê awanîya edlîyeyî û serdozgerîye ya komare ya Rihaye de Nobeta Edaletî dayî destpêkerdiş û 846 rojan çalakîya înan dewam kerdbî. Xeylê dezgeh û komele şîyî zîyaretê Emîneye û waştî ke bibê vengê aye. Raşteyê mîyanneteweyî ra seba Emîneye paştîdayîş ame dayîş.

 

Riha ra berdî Anqara 

 

846 rojan vera çalakîya Emîneye bêveng mendî û Emîneye bi hêvîya ke do wezîrê edaletî aye reyde pêvînayîş bikero şî Anqara. Emîneye tîya de wezîrî rê waştişê pêvînayîşî kerd la bi bahaneyê cîya pêvînayîş ame redkerdiş. Nê çîyî ra dima Emîneye wezîrîya edaletî de destê bi nobeta edalet kerd. 

 

Hîrê berî zî ameyî girewtiş 

 

Wezarîye nobeta Emîneye ra tersa bi desan reyan polîsan aye girewt ablûqa. Nêverdayî ke rojnamegerî video biancê û kes nizdîyê Emîneye nêame kerdiş. Emîneye her roje verê wezîrîye de veng kerd û bi aşman o bi dovîzê ‘Girewtişê beran acizî yo. 2 lajê mi û mêrdeyê mi nêweşxane de ameyî qetilkerdiş. Waştişê ma edalet o’ ruşena. Wezîrî hîrê beran zî bi bahaneyê asayîşî girewt.

 

Şîdetê fîzîkî û psîkolojîk 

 

Emîneye nê prosesî vera şîdetê psîkolojîk û sewbîna vera nêweşîyan têkoşîn da. Emîneye dermankerdişê psîkolojîk vînena û çimê aye yê raşt semedo ke bermena se ra 70 xira bîyo. Emîneye dej û kederan ra nêweş kewte û amelîyat bîye. Sewbîna zerrîya xo ra zî nêweş a. Bi dermanê ke wena eşkena wirza. 

 

9ê Adara 2021î ra heta nika 31 tehqîqat Emîneye rê ameyî akerdiş û înan ra 11 hebî açarîyayê dewa. Nika nobeta edaletî ya Emîneye dewam kena û nîno zanayîş ke do kêy berê wezîrîye bêrê akerdiş.