STENBOL - Dayîkê Şemeyî çalakîya nê hewteyî de aqûbetê Husamettîn Yaman û Soner Gulî yê 32 serrî verê ame destbendkerdiş û vînîkerdiş û pêwa îtirafê Ayhan Çarkin zî derheqê înan de tu agahî nêameye dayîş, persayî û vatî ke ê do fek ci ra vera nêdê.

 

Dayîkê Şemeyî/Merdimê Şemeyî seba persê aqûbetê kesê ke destbendkerdişan de ameyî vînîkerdiş û qetilkerdiş û muhakemekerdişê faîlê înan, hewteyê 997ine de Raşteyê Galatasarayî yê Stenbolî ameyî têhet. Pêwa Dayîkê Şemeyî/Merdimê Şemeyî, Hemsereka Pêroyî yê Komeleya Heqê Merdiman (ÎHD) Eren Keskîn û xeylêk kesî tewrê çalakîye bîyî. Çalakîkerî fotografê vîndîbîyayeyan berz kerdî. 

 

Çalakîya nê hewteyî de aqûbetê wendekarê unîversîte Husamettîn Yaman û Soner Gul ame perskerdiş. Metnê eşkerayîye hetê Masîde Ocak ra ame wendiş.

 

Eşkerayîye de wina ame vatiş: 

 

Husamettin Yaman 2yê Gulana 1992ine roja şemeyî keye ra vejîya. 4ê Gulane roja dişeme de kesêk telefonê birayê ey Feyyaz Yaman geyra û vat: 'Husemettîn pêwa Soner Gulî Findikzadeyî de destbend bîyî. Ma cuya ra înan ra tersenê. Lezêr muracatê emniyetî bikerê', Keyeyê Yaman û Gulî destpêk de muracatê Midûriyeta Polîsan ê Stenbolî û dima ra muracatê pêro sazgehê pêwendîdarî yê dewlete kerd. Komeleya Heqê Merdiman û Amnesty însiyatîf girewtî. Labelê nêame qebûlkerdiş ke Husamettîn û Soner ameyê destbendkerdiş. Hewldayîşê xo dewam kerdî, keyeyê Yaman 2 serrî binê çimdarîyê polîsan de mend. 19ê Kanûna 2011ine de îfadeyê polîsê tevgerê taybetî Ayhan Çarkinî yê derheqê înfaz û vîndîbîyayeyan de ameyî weşanayîş. Ayhan Çarkin îfadeyê xo de dîyar kerd ke  dimayê destbendkerdişê Husamettîn Yaman û Soner Gulî, raşteyê daristanî de cipersayîş kerdê û dima ra înfaz kerdê. Dimayê nê îfadeyan keyeyê Yamanî ancî muracatê sûcî kerd û waşt dosya newa ra bêro akerdiş. Pêwa îfadeyê Ayhan Çarkinî zî  dosya de tu averşîyayîş nêvirazîya. Na rewşe mojnena ke hukm ne xoser û bêhet o û tesîrê siyasî rê akerde yo."

 

Eşkerayîye bi ronayîşê qurnefîlan ê Raşteyê Galatasarayî yê binê ablûqa de bî, peynî bî.