Zelal Tunç

 

Baxçeyê Horhorî ke kontarê Keleya Wanî ya qezaya Rêya Armûşê yê Wanî yo, bi tarîx, vîyarte û xozaya xo bale anceno. Baxçeyê Horhorî de hetêk ra darî yenê birnayîş, heto bîn ra zî sey wareyê sergo yeno şuxilnayîş. Baxçeyan de qirkerdişêk pîl est o. Baxçeyê Horhorî ke hîrê hezar serre yê, nameyê xo çimeyê awa binê kela ra gênê, her yew darêke baxçe rêça seserran serê xo de hewêneno. 

 

Birnayîşê daran ra xebera înan çin a

 

 

Baxçe hetê xeylêk şaristanan ra sey merkez ameyo şuxilnayîş û hîrê hezar serrî ameyoxê înan est o. Hetê wezaretê hawirdor û bajarwanî ra sey ‘wareyê pawitişê xozayî yê sîtî’ ameyo tescîlkerdiş. Her serre bi hezaran turîstê xerîbî û herêmî bi pere kewenê nê baxçeyan. La baxçe de bi desan darî ameyî birnayîş. Nîno zanayîş ke darî hetê kamî ra yenê girewtiş û pêwa nobedarê asayîşî zî vernîya rewşe nîna padayîş. Ma wezîfedaran ra persenê la vanê ke zanayîşê înan çin o.

 

Hetêk ra qirkerdişê daran hetêk ra çop

 

 

Baxçe de tenê darî nê, çopê ke hetê kesê şinê serdayîşê baxçeyan ra yenê eştiş zî rayîr texrîbatêk pîlî rê akeno û ware açeryayo wareyê sergo. Berardişê plastîkî wareyî wêran kerdê û tesîrêk pîlî serê tewirê ganeyan kenê.

 

Vernîya awe ameye padayîş

 

 

Baxçeyê ke talanî rê ameyê akerdiş tenê qirkerdişê daran nê û çopî zî yenê eştiş; bi restorasyono ke hetê wezareta kultur û turîzmî, walîtiya Wanî û qeyûmê şaredarî ra ameyo kerdiş zî xoza û tarîxê baxçeyan ameyo çinkerdiş. Vernîya çimeyê awe ame padayîş û çirrê ke vejîyayo werte zî vernîya awe vurnayo. Seba nê texrîbatî cuya ganeyan binê tehluke de ya.