Yeşîm Oruç

 

MERKEZÊ XEBERAN - Goreyê çeteleyê şîdetî yê aşma nîsane 30 cinî û 2 tutî ameyî qetilkerdiş. Merdişê 15 cinîyan zî şikin o. 

 

Bîlançoyê şîdet û qetilkerdişê cinîyan ê Kurdistan û Tirkîya her ke şino zêdeyêr beno. Kerdoxî bêceza yenê verdayîş û sûcê hemverê cinîyan bi vatişê îktîdarî meşrû yenê vînayîş. 

 

Goreyê çeteleyê aşma nîsane de 30 cinî û 2 tutî ameyî qetilkerdiş. Sewbîna merdişê 15 cinîyan û tutêk zî şikin o.

 

Amed de cinîyêke, Edirne de cinîyêke, Balikesirî de cinîyêke, Tekîrdag de cinîyêke, Bolu de cinîyêke, Kayserî de cinîyêke, Mugla de cinîyêke, Karabuk de cinîyêke, Agirî de cinîyêke, Kirikkaleyî de cinîyêke, Aydin de cinîyêke, Çankiri de cinîyêke, Mêrsîn de 2, Mereş de 2, Anqara de 2, Manîsa de 2, Semsûr de 2, Samsûn de 2 û Stenbol de zî 4 cinî ameyî qetilkerdiş. 

 

11 cinî hetê camêrdê ke ey reyde zewicnayebî ra, cinîyêke hetê camêrdê ke fek vera dabî, 7 cinî hetê camêrdê ke înan reyde sewîyeya veradayîşî de bî, cinîyêke hetê tutê xo ra, cinîyêke hetê birayê xo ra,  3 cinî hetê camêrdê ke ci reyde ciwîyayîne, cinîyêke hetê merdimanê xo ra, 2  cinî hetê camêrdê ke ê nas kenê ra, 2 cinî hetê embazanê xo ra û 2 cinî zî hetê apê xo ra ameyî qetilkerdiş.