Elfazî Toral

 

STENBOL - Hetkara Hemsereka Pêroyî ya DEM Partî Sevtap Akdag, dîyar kerd ke îktîdar vayîya gule û nan ano têhet, behsê serkewtişê xo keno û hemverê kurdan de konseptêk şerî keno û no zî beno sebebê vînîkerdişê ekonomîye.

 

Seba polîtîkayê îktîdarî, welatîjî êdî nêeşkenê lazimîyê xo yê bingehîn ca bîyarê. Roj bi roje feqîrî hîna kûr bena. Hetkara Hemsereka Pêroyî ya Parîya Têduştî û Demokrasî (DEM Partî) Sevtap Akdag, ajansê ma rê qisey kerd.

 

Sevtape, dîyar kerd ke beşêk pîl ê komelî feqîr o û wina dest dest bi qiseykerdişî kerd: "Welatîjî nêeşkenê xo biresnê weşîye, xida, starbîyayîş û cil û belgan. Krîzê ekonomî tesîr serê pêro cuye de kerdo. No beno sebebê problemê pîlî. Seba çinbîyayîşê karî welatî mecbûr koçber benê. Bedelê tewr pîl ê krîzê ekonomîye kedkar û feqîrî danê."

 

Sevtape, wina bale ant serê reqamê ke vejîyayê werte: "Goreyê reqamê enflasyonî yê TUÎKî enflasyon di qatî zêde bîyo. Welatijî êdî bazar de nêeşkenê dayîşûgirewtiş bikerê û nêeşkenê kartol û pîyaz bigîrê. Nêeşkenê lazimîyê xo yê bingehîn pê bîyarê. Rewşa ekonomîye wina ya la îktîdar hema zî îdia keno ke do rewşa ekonomîye rast bikero. Zêdenekerdişê meaşê karker, teqewitan ra rewşe tewr xirab bena. Xeylêk welatîjî hema zî binê meaşê kêmî de şuxilênê.”

 

Sevtape, dewam de wina vat: "Mîyanê komelî de tewr zêde cinî û tutî krîzê ekonomî ra tesîr benê. Sewbîna her ke şino kedwerî zêde bena. Ganî sermaye seba feqîran û kedkaran bo. La AKP seba şerî pere xerc kena. Sebebê bingehîn ê krîzî ekonomî şer o û nêçareserkerdişê problemê kurdî yo. Demêk derg o nêwazenê problemê kurdî çareser bikerê û nê helwestî de zî israr kenê. Hukmat bi çêkê ke dewletan rê roşeno rê pesnê xo dano. Bi berardişê çeke, vayîya gule û nanî ano têhet, qalê serkewtişê xo keno. Hemverê kurdê ke  Iraq û Sûrîye de ciwîyenê, konseptêk şerî keno. No beno sebebê vînîkerdişê ekonomî."

 

Sevtape, da zanayîş ke hemverê polîtîkayê şerî, polîtîkayê aştîye pawenê û wina qedêna: "Ma nika seba pratîzekerdişê waştişê welatijan têkoşînê xo dewam bikerê.”